Buxoro viloyatining Qorovulbozor tumanida tadbirkorni qarzdor qilib qo‘ygan hokimlik xodimi va boshqalarga nisbatan jinoyat ishi qo‘zg‘atildi. Bu haqda Bosh prokuratura huzuridagi departament xabar berdi.
Bosh prokuratura huzuridagi departamentning Qorovulbozor tuman bo‘limi tomonidan tadbirkorlik subyektlarining huquqlarini himoya qilish yuzasidan o‘tkazilgan tergovga qadar tekshiruvda, tuman hokimligining tashkiliy kadrlar guruhi rahbari U.P. va boshqalar “U.E.” MCHJ rahbari N.ning ishonchiga kirib, uning nomidan hujjatlarni soxtalashtirish orqali bank filialidan 290 million so‘m kredit ajratilishiga erishib, tadbirkor N. hamda fuqaro M.ni bank oldida qarzdor qilib qo‘yib, kredit mablag‘ini firibgarlik yo‘li bilan o‘zlashtirgani aniqlangan.
Mazkur holat yuzasidan Jinoyat kodeksining 168-moddasi (firibgarlik) va 228-moddasi (hujjatlar, shtamplar, muhrlar, blankalar tayyorlash, ularni qalbakilashtirish, sotish yoki ulardan foydalanish) bilan jinoyat ishi qo‘zg‘atilib, tergov harakatlari o‘tkazilmoqda.
Izoh (0)