O‘zbekiston sog‘liqni saqlash tizimining sifati 10 ballik ko‘rsatkichdan 5-6 ballga mos. Bu haqda Tibbiyot fanlari nomzodi, onkolog shifokor Maqsud Mallayev “Daryo”ga bergan intervyusida aytib o‘tdi.
Maqsud Mallayevning ta’kidlashicha, bir qator tizimli muammolar borligi sababli tibbiyot rivojlanishi sekin kechmoqda.
“Tibbiyotga natijalar va xalqning sog‘liq darajasi baho qo‘yib beradi. Hozirgi O‘zbekiston tibbiyotini umumiy hisobda 10 ballik ko‘rsatkichdan 5-6 ballga baholasak bo‘ladi. Tibbiyot — shaxsga bog‘liq soha. Tibbiyotimizning eng oqsoqlanayotgan joyi kadr muammosida.
2016-yildan hozirgacha xususiy shifoxonalarning davlat shifoxonalariga nisbati 10 baravar oshdi. Ya’ni o‘rtada raqobat boshlandi. Xususiy klinika shifokorga ko‘proq sharoit yaratyapti, yengilliklar va motivatsiya beryapti. Shunday bo‘lgach, davlat shifoxonalaridagi salohiyatli shifokorlarning ko‘pchiligi xususiy shifoxonalarga o‘tib ketdi. Oqibatda davlat shifoxonalarida kadrlar yetishmovchiligi boshlandi”, — dedi mutaxassis.
Maqsud Mallayevning qo‘shimcha qilishicha, ayrim shifokorlarning xorijga chiqib ketayotganiga bir nechta sabablar bor.
“Budjetdan millardlab mablag‘lar ajratilib, davlat klinikalariga yangi apparaturalar olib kelindi. Lekin ularni ishlata oladigan kadrlar hozir xususiy klinikalarda ishlamoqda yoki ko‘pchiligi chet elga ketib yuborgan.
Ular xorijga ketishining birinchi sababini moddiy manfaatdorlik deb olsak, ikkinchi asosiy sabab — davlat klinikalarida motivatsiyaning tubdan sindirilganida. Bizda davlat klinikasiga yangi ishga kelgan shifokor salgina bosh ko‘tarsa, uni qayta tiklanmas qilib sindirib yuborish holati bor. Katta majlislarda 5-6 marta ruhan sindirilgan shifokor, butun umrini tibbiyotga bag‘ishlagan bo‘lsa ham, bor-e, tibbiyot ham kerak emas, undan ko‘ra mardikorlik qilaman, deb, kerak bo‘lsa, mardikor bo‘lib yurganlar bor.
Taxminan olaylik, davlat bitta dehqonni tayyorlash uchun 10 ming dollar sarflaydi. Bir muhandisni tayyorlashga 50 ming dollar xarajat qiladi. Bir shifokorni tarbiyalash uchun esa 100 ming dollar sarflaydi. Davlatning 100 ming dollarli kadrini ayrim boshliqlar tibbiyotga oid bo‘lmagan sabab bilan, ya’ni shaxsiy g‘araz tufayli ishdan bo‘shatib, yo‘q qilib yubordi. Axir 10 yillab o‘qigan, katta bosqichlardan o‘tgan kadrning qadriga yetishimiz kerak-ku”, — dedi onkolog.
Avvalroq “Daryo”da Maqsud Mallayev bilan suhbatning to‘liq shakli e’lon qilingandi.
Izoh (0)