Бухоро вилоятининг Вобкент туманида фуқарога пичоқ билан оғир тан жароҳати етказган 16 ёшли ўсмирга икки йил озодликдан чеклаш жазоси қўлланилди. Бу ҳақда «Дарё»га жиноят ишлари бўйича Вобкент туман суди раиси маълум қилди.
Суд ҳужжатларига кўра, вояга етмаган Ж.Б. яқин дўсти Д.Д. билан онасига тегишли Laсetti’да «Чармгарон» маҳалласида жойлашган ошхонага овқатлангани борган. У ерда акаси билан пиво ичган. Овқатланиб бўлгач, ўсмир йигитлар машинага ўтириб, автомашина эшикларини очиб қўйган ҳолда, жамиятда юриш-туриш ва тартиб-интизом қоидаларини бузиб, кўчадан ўтаётган одамларга ҳар хил гаплар гапириб, бачкана ва беўхшов қилиқлар қилган. Автомобиль олдидан ўтган нотаниш фуқаро Ж.Ш.нинг ортидан хунук сўзлар айтиб, уни ҳақоратлаган. Шунда нотаниш киши ортига қайтиб, ўсмир йигитлардан сўкиниши сабабини сўраган. Ўсмирлар эса уни калтаклай бошлаган. Ж.Ш. ўзини ўнглаб олгунча машинада турган пичоқни олиб, унинг қорин қисмига жароҳат етказган. Ҳолатдан хабар топган Ж.Б.нинг акаси воқеа жойига келиб, укасини безориликдан тўхтатиб қолган.
Республика суд тиббий экспертиза илмий-амалий маркази Бухоро филиали Вобкент туман пункти ходимлари бемор аҳволини ўрганиб, калтаклаш орқали унга оғир тан жароҳати етказилганини баёнлаштирган.
Суд мажлисида судланувчи Ж.Б. ўз айбига тўлиқ иқрорлик билдирган. Қизиққонлиги, жанжални ҳақиқатан ўзи бошлагани, нотаниш фуқарога нисбатан қилган хатти-ҳаракати ва қилмишидан пушаймонлигини айтган. Жабрланувчи Ж.Ш. ҳам ўзига етказилган зарар унинг оила аъзолари томонидан тўлиқ қоплаб берилгани ва вояга етмаган болага нисбатан даъвоси йўқлиги ҳақида кўрсатув берган.
Суд ўсмирни Жиноят кодексининг 104-моддаси (қасддан баданга оғир шикаст етказиш) билан айбдор деб топиб, судланувчига нисбатан Жиноят кодексининг 57-моддаси (енгилроқ жазо тайинлаш)ни қўллаб, икки йил озодликни чеклаш жазосини қўллаган.
Изоҳ (0)