Apellyatsiya arizalarini ko‘rib chiqish 7-sentabrdan boshlanadi — DTM

28-avgust kuni oliy ta’lim muassasalarining bakalavriat ta’lim yo‘nalishlariga kirish test sinovi natijasidan norozi bo‘lgan abituriyentlardan apellyatsiya arizalarini qabul qilish boshlangan edi. Davlat test markazining ma’lum qilishicha, 6-sentabr arizalarni qabul qilishning so‘nggi kuni hisoblanadi.

Shuningdek, 31-avgust kuni talabalar o‘qishini xorijdan O‘zbekistondagi davlat OTMlariga ko‘chirish bo‘yicha test sinovi natijasidan norozi bo‘lgan talabgorlardan apellatsiya arizalarini qabul qilish yo‘lga qo‘yilgan.

Apellyatsiya arizalarini qabul qilish my.dtm.uz sayti orqali onlayn tarzda amalga oshirilmoqda. Apellyatsiya arizasini bergan abituriyentga uni ko‘rib chiqish sanasi va vaqti ko‘rsatilgan xabarnoma beriladi.

Abituriyent xabarnomada belgilangan vaqtda shaxsini tasdiqlovchi hujjat, xabarnoma va abituriyent ruxsatnomasi bilan Davlat test markaziga kelishi lozim.

Apellyatsiya arizalarini ko‘rib chiqish 2022-yil 7-sentabr kunidan boshlanadi.