Олий Мажлис Қонунчилик палатаси спикери ўринбосари, «Миллий тикланиш» демократик партияси марказий кенгаши раиси Алишер Қодиров янги авлод педагогларини тайёрлаш учун бир қатор таклифларни илгари сурди.
Унинг таъкидлашича, давлат нафақат мактабда ўқиш учун шароитни, балки тўлиқ китоб билан таъминлаш ва қисман овқатлантириш харажатларини ҳам ўз зиммасига олиш орқали миллат ва давлат келажагига жуда катта инвестиция йўналтирмоқда. Бунинг натижаси соғлом, тафаккурли, ватан ва миллатини ардоқлайдиган, ҳуқуқ ва мажбуриятларини англайдиган ва амал қиладиган инсон бўлиши керак. Бу натижага эришиш ёки эришмасликни педагоглар ҳал қилади.
«Совет давлати ҳам ҳамма нарсани текин қилган, лекин педагоглар олдига совет идеологияси билан тарбияланган эътиқодсиз, бефикр ва ўзини беқадрлигидан миннатдор жамиятни яратиш каби бузуқ вазифа қўйган. Аъло баҳо учун ўқи, ёлғон бўлса ҳам, доимо биринчи бўл, олий маълумотсиз иккинчи ‘сорт’ бўлади каби устуворликлар билан тўйинган болалар бу мезонларни жамиятни ўлчовига айлантирди», — дейди Қонунчилик палатаси спикери ўринбосари.
Депутат бугунги тез ўзгарувчан ва аёвсиз рақобат муҳитида ўзини ва ватанни англайдиган ва қадрлайдиган янги авлод педагогларини тезлаштирилган шаклда тайёрлаш учун қуйидаги таклифларни берди:
- Педагоглар фақат давлат буюртмасига мувофиқ ўқитилиши лозим;
- Олий маълумот олган педагог 3-5 йил давлат тайинлови асосида мактабда ишлаши шарт (албатта, маош ва иш шароитини тўлиқ яратиб бериш ҳисобига);
- Педагогика соҳасига алоҳида психоаналитик синов, ижодий имтиҳонда танлаб олинган ва имтиҳондан муваффақиятли ўтган абитуриентлар қабул қилиниши керак;
- Педагогларни тайёрлаш ўқув дастури 3 йилга қисқартирилиши лозим;
- Педагог фаолиятини давом эттириши учун ҳар йили малакасини талаб даражасида эканлигини тасдиқлаши шарт бўлиши керак. Педагог малакасини тизимли ва давлат ҳисобига ошириш амалиёти серхаражат, самарасиз ва мантиқсиз;
- Таълим сифатини назорат қилиш инспекцияси ва функцияси Олий Мажлисга ўтказилиши керак. Бу масалада камчиликлар билан муросасозлик эмас, муросасизлик принципи ишлаши керак;
- Дарсликларнинг мазмуни, уларга киритиладиган ҳар қандай ўзгартиш ва қўшимчалар Олий Мажлисда тузиладиган махсус комиссия томонидан тасдиқланиши керак.
Мавзуга доир:
- Мактаб дарсликлари ижараси бепул бўлади: президент бу бўйича топшириқ берди
- Дарсликлар нашр этишда коррупцион схемаларга йўл қўймаслик шарт: Президент администрацияси бошчилигида дарсликлар тўлиқ текширувдан ўтказилади
- Комил Алламжонов мактаб дарсликлари бўйича муаммо ва ечимлар ҳақида мурожаатлар йўллашни сўради
Изоҳ (0)