Чўкиб кетган «Титаник» кемаси биринчи марта 8K сифатида тасвирга олинди (видео)

OceanGate Expeditions лойиҳаси олимлари чўкиб кетган «Титаник» кемасини биринчи марта 8K сифатида тасвирга олди, деб ёзади «РБК».

Ноёб видеотасвир мутахассисларга 100 йилдан олдинроқ ҳалокатга учраган кеманинг аста-секинлик билан емирилиши табиатини яхшироқ ўрганишда ёрдам беради.

Metro хабарига кўра, кема беш киши учун мўлжалланган OceanGate Titan сувости қурилмаси ёрдамида тадқиқ қилинган. Батискаф (чуқур сув остида юрадиган қурилма, камера) 4 минг метрдан зиёд чуқурликка туша олади — «Титаник» ҳам тахминан шундай чуқурликда жойлашган.

Экспедиция шу йилнинг май ойида бўлиб ўтган, ўшанда лайнер Шимолий Атлантикада ҳалокатга учраган жойга Канаданинг Ньюфаундленд оролидан тадқиқот кемаси жўнаб кетган. Олимлар саккиз кун давомида очиқ денгизда бўлган. Экспедицияда тижорий мижозлар ҳам қатнашган, денгиз саёҳати уларнинг ҳар бирига 250 минг долларга тушган.

Деталлаштирилган тасвирга олишга янгича ёндашув 1912 йил баҳорида чўкиб кетган кеманинг кўплаб унсурларини кўриш имконини берди. Масалан, кема лангарига туширилган Noah Hingley & Sons Ltd. ёзувини кўриш мумкин бўлди. Бундан ташқари, океан қаъридан олимлар лайнернинг улкан буғ қозонларидан бирини топди.

OceanGate Expeditions компанияси сув остида «Титаник»ни максимал даражада юқори аниқликда суратга олиш ишларини давом эттирмоқчи. Экспедиция 2023 йил май ойига мўлжалланган.