Osiyo taraqqiyot banki (OTB) qishloq xo‘jaligi mahsuldorligini oshirish uchun yer va suv resurslarini yanada samarali boshqarish orqali O‘zbekistonning oziq-ovqat va suv xavfsizligini yaxshilash uchun 150 million dollar miqdorida kredit va 3 million dollar grant ajratilishini ma’qulladi.
Bank rasmiy saytida ma’lum qilinishicha, “Orolbo‘yi havzasida iqlimga moslashgan holda suv resurslarini boshqarish” loyihasi muayyan irrigatsiya-drenaj tizimlarini modernizatsiya qilish orqali ularni yanada samarali boshqarish bo‘yicha mamlakat salohiyatini oshirish orqali suv resurslaridan samarali foydalanilishini ta’minlaydi. Shuningdek, bank yuqori darajadagi texnologiyalar fondidan 300 ming dollar miqdorida grant ajratadi.
Hisob-kitoblarga ko‘ra, O‘zbekistonda foydalaniladigan barcha suv resurslarining 90 foizi qishloq xo‘jaligiga, jumladan, g‘alla va paxtani sug‘orish uchun sarflanadi. Biroq iqlim o‘zgarishi suv ta’minotiga ta’sir ko‘rsatmoqda. Loyiha doirasida Amudaryo va Zarafshon daryolari havzalarida suvni hisobga olish tizimini yaxshilash va mavjud irrigatsiya- drenaj infratuzilmasini yangilash orqali iqlimga chidamli va takomillashtirilgan sug‘orish tizimlarini yaratish rejalashtirilgan.
OTB, shuningdek, hukumatning suv resurslarini boshqarish strategiyasining asosiy elementlarini amalga oshirish va O‘zbekistonda suv xo‘jaligi va irrigatsiya sektorini rivojlantirish borasidagi harakatlarini qo‘llab-quvvatlash uchun 850 ming dollar miqdorida texnik yordam grantini ajratadi.
Izoh (0)