Prezident administratsiyasi rahbari o‘rinbosari Komil Allamjonov Mustaqillik bayramining 31 yilligi munosabati bilan o‘tkazilgan tadbirda so‘zga chiqqan Shavkat Mirziyoyevning asosiy 5 ta soha haqida aytgan gaplariga o‘z fikrlarini bildirdi.
Kechagi prezident ma’ruzasi nimasi bilan farq qiladi? Undagi masalalar doim aytib kelinardi-ku?Gap shundaki, yurtimizda muammo ko‘p, uning yechimi uchun imkoniyat kam. O‘zimizni qancha o‘qqa-cho‘g‘ga urmaylik, chegaralangan imkoniyat bilan masalani oxiriga yetkaza olmaymiz. Ishlarimiz natijasi chala-chulpadek bo‘lib qolaveradi.
Buning yechim qanday degan savolga kecha prezident javob berdi.
U 5 ta sohani ustuvor qilib ajratib, hozirgi bor imkoniyat bilan shu 5 ta sohani 5 ga bajaramiz, uni ustiga o‘tirib olib, yoyilib ketmasdan ishlaymiz, demoqchi bo‘lyapti.
Nega aynan shu 5 ta soha?
Ta’lim rivojlansa, bilimlilar ko‘payadi. Bilimlilar yurti hech qachon qoloq bo‘lmaydi.
Biznes ortidan odamlar, jamiyat boy bo‘ladi. Kambag‘allik qisqaradi. Boylari ko‘p yurtda turli sohalar, servis xizmatlar, umuman, yaxshi hayotga intilish kuchayadi va barpo bo‘ladi.
Biznesmenlar huquqlarini shaxslar emas, qonun, odil sud himoya qila olsa, ular pulini chetga olib chiqib ketmaydi, chetdan kiradigan investorlar soni ham shunga qarab ko‘payadi, chunki ularda ham ishonch bo‘ladi. Aslida hamma muammoning yechimi bu — odil sud. Sud kuchli bo‘lsa, oddiy aytganda, ta’limda ham, biznesda ham, meditsinada ham, suvda ham, umuman, hamma sohada “bespredel” kam bo‘ladi. Hamma o‘zining o‘rnini bilib yuradi. Ertaga suv qurib qolsa, islohotlar ham ko‘ngilga sig‘maydi. Hozir suv kamayishi tezlashgan. Yaqin yillarda ayrim hududlar cho‘lga aylanib, qurg‘oqchilik kuchayib ketishi xavfi ortib boryapti. Meditsina muhimligini-ku, gapirmasa ham bo‘ladi. U yerdagi korrupsiya va sifatsiz xizmatga har birimiz doim to‘qnash kelamiz.
Bir so‘z bilan aytganda, aynan shu 5 ta sohani 5 ga bajara olishimiz shart, — deydi u Telegram kanalida e’lon qilgan postida.
Izoh (0)