Осиё тараққиёт банки (ОТБ) қишлоқ хўжалиги маҳсулдорлигини ошириш учун ер ва сув ресурсларини янада самарали бошқариш орқали Ўзбекистоннинг озиқ-овқат ва сув хавфсизлигини яхшилаш учун 150 миллион доллар миқдорида кредит ва 3 миллион доллар грант ажратилишини маъқуллади.
Банк расмий сайтида маълум қилинишича, «Оролбўйи ҳавзасида иқлимга мослашган ҳолда сув ресурсларини бошқариш» лойиҳаси муайян ирригация-дренаж тизимларини модернизация қилиш орқали уларни янада самарали бошқариш бўйича мамлакат салоҳиятини ошириш орқали сув ресурсларидан самарали фойдаланилишини таъминлайди. Шунингдек, банк юқори даражадаги технологиялар фондидан 300 минг доллар миқдорида грант ажратади.
Ҳисоб-китобларга кўра, Ўзбекистонда фойдаланиладиган барча сув ресурсларининг 90 фоизи қишлоқ хўжалигига, жумладан, ғалла ва пахтани суғориш учун сарфланади. Бироқ иқлим ўзгариши сув таъминотига таъсир кўрсатмоқда. Лойиҳа доирасида Амударё ва Зарафшон дарёлари ҳавзаларида сувни ҳисобга олиш тизимини яхшилаш ва мавжуд ирригация- дренаж инфратузилмасини янгилаш орқали иқлимга чидамли ва такомиллаштирилган суғориш тизимларини яратиш режалаштирилган.
ОТБ, шунингдек, ҳукуматнинг сув ресурсларини бошқариш стратегиясининг асосий элементларини амалга ошириш ва Ўзбекистонда сув хўжалиги ва ирригация секторини ривожлантириш борасидаги ҳаракатларини қўллаб-қувватлаш учун 850 минг доллар миқдорида техник ёрдам грантини ажратади.
Изоҳ (0)