Россия Европага табиий газ етказиб беришни вақтинча тўхтатди ва Франция коммунал хизматига барча етказиб беришни тўхтатди. Бу эса минтақадаги инфляцияни рекорд даражадаги 9 фоизга етказган энергетика инқирозини чуқурлаштирди, деб ёзмоқда CNN.
Россия давлат энергетика гиганти «Газпром» 31 августда «Шимолий оқим 1» қувури орқали барча экспортни тўхтатди. Бунга эса таъмирлаш ишларини сабаб қилиб кўрсатди. У 3 кун давом этади.
«Шимолий оқим 1» Россиянинг қитъага улкан газ етказиб берувчи асосий артерияси ҳисобланади. Бу қувур ўтган йили Европа умумий Россия газ импортининг қарийб 35 фоизини ташкил қилиб, тўғридан-тўғри ЕИнинг энг йирик иқтисодиёти бўлган Германияга оқиб келган.
Сўнгги ойларда «Газпром» «Шимолий оқим 1» орқали оқим ҳажмини 20 фоизга қисқартирди, бунга техник хизмат кўрсатиш билан боғлиқ муаммолар сабаб бўлди ва ғарб санкцияларини Украинадаги урушга жавобан технология экспорти билан боғлади.
Шартномаларда кўрсатилган евро ёки долларда эмас, балки газга рублда тўлашдан бош тортгани учун Россия бир қанча «дўстона бўлмаган» Европа давлатлари ва энергетика компанияларига етказиб беришни ҳам тўхтатди.
Франциялик Engie энг сўнгги қурбондир. 30 августда «Газпром» июль ойида етказиб берган газ учун компаниядан тўлиқ тўлов олмаганини даъво қилиб, 1 сентябрдан бошлаб Engie’га етказиб беришни бутунлай тўхтатиб қўйишини билдирди.
Европа Иттифоқи статистика идораси 31 августда эълон қилган дастлабки ҳисоб-китобларга кўра, август ойида евродан фойдаланадиган 19 мамлакатда инфляция 9,1 фоизни ташкил этди. Бу ЕИ 1997 йилда қайдларни юрита бошлаганидан бери энг юқори кўрсаткичдир.
Энергия нархлари инфляциянинг ягона асосий омили бўлиб, йил давомида — августгача 38 фоизга ўсди.
Европа Иттифоқи мамлакатлари ноябрь ойигача газ омборларини камида 80 фоиз қувватига тўлдириш мақсадига эришди.
Германия канцлери Олаф Шолз унинг мамлакати жорий қиш мавсумига газ таъминотини амалга ошириш борасида «бир неча ой олдин кутилганидан кўра анча яхши тайёрланганини» айтди.
Изоҳ (0)