CPJ xodimi Gulnoza Said O‘zbekistonga kiritilmayotgani haqida xabar qilindi. Mass-media fondi va Elchixona aralashuvidan keyin muammo ijobiy hal qilindi

Jurnalistlarni himoya qilish qo‘mitasining (CPJ ) Yevropa va Markaziy Osiyo bo‘yicha koordinatori Gulnoza Said 30 avgust kuni O‘zbekistonga kiritilmayotgani haqida xabarlar paydo bo‘ldi.

CPJ e’lon qilgan xabarga ko‘ra, Toshkent aeroportida mutasaddilar Gulnoza Saidga immigrasiya tizimi unga O‘zbekistonga kirish uchun ruxsat yo‘qligini ko‘rsatganini aytishgan.

AQSH fuqarosi bo‘lgan Gulnoza Saidga 1-sentyabr kuni Nyu-Yorkka uchadigan samolyot parvozigacha aeroportda qolishi lozimligini, keyin esa mamlakatni tark etishi kerakligini bildirishgan.

Mass-media fondi ushbu muammoni hal qilish uchun O‘zbekistonga kirish va chiqish masalalarini tartibga soluvchi davlat organlariga zudlik bilan tegishli so‘rov yubordi.

Shuningdek, O‘zbekistonning AQSHdagi elchixonasi ham vaziyatga aralashib, kerakli chora-tadbirlarni amalga oshirdi. Shundan so‘ng, Gulnoza Saidning O‘zbekistonga kirishiga ruxsat berilgan.

O‘z o‘rnida CPJ prezidenti Jodi Ginsberg ko‘rsatilgan amaliy yordam uchun barchaga minnatdorchilik bildirib o‘tdi.

“Bu masalani hal qilishda O‘zbekiston tomonidan ko‘rsatilgan yordam uchun uchun katta rahmat” – deb yozdi Ginsberg.