Путин муҳожирлар учун «адаптация марказлари» ташкил қилиш ғоясини қўллаб-қувватлади. У ерда Россия анъаналари ва маданияти ҳақида маълумот берилади

Россия президенти Владимир Путин Миллатлар масалалари бўйича федерал агентлик раҳбари Игорь Бариновнинг муҳожирлар учун адаптация (мослашиш) марказларини ташкил қилиш бўйича ташаббусини қўллаб-қувватлади, деб ёзади Meduza президентнинг мансабдор билан учрашуви ҳақидаги Кремль хабарига таяниб.

Учрашувда Баринов Россия иқтисодиёти чет элдан ишчи кучи оқимига эҳтиёж сезаётганини айтди, аммо кўп сонли муҳожирлар «этномаданий ландшафт» ўзгаришига олиб келиши мумкин, бу эса анклавлар шаклланиши ва этник жиноятлар ўсиши хавфини оширади.

Ушбу муаммоларни ҳал қилиш учун Миллатлар масалалари бўйича федерал агентлик Россияда «адаптация марказлари» ташкил қилиш таклифини киритди, у ерда муҳожирлар маҳаллий анъаналар, урф-одатлар, маданият ҳақида маълумотга эга бўлиб, шунингдек, ҳуқуқий ва руҳий кўмак олиши мумкин бўлади.

Владимир Путин бу ғояни қўллаб-қувватлади ва бундай ишларни «потенциал муҳожирларнинг ватанидаёқ» бошлаш кераклигини қўшиб қўйди.

«У ерда ҳеч ким бунга қарши эмас, ҳеч ким норози бўлмайди. Аксинча, Ўзбекистонда, Тожикистонда, Қирғизистонда — марҳамат, уларнинг ҳаммаси буни мамнуният билан амалга оширади. Биз фақат у ерда ўзимизни фаолроқ тутишимиз керак, улар ҳатто бундан манфаатдор. Одамлар ватанидан кетиб, бизнинг мамлакатга келганида мослашиши кераклигини, бизнинг маданиятимиз, тилимизни, Россия қонунчилигини билиши кераклигини улар жуда яхши англайди», — деди президент.

Нашр эслатишича, аввалроқ Россия Хавфсизлик кенгаши раиси ўринбосари Дмитрий Медведев хорижликларнинг кириш ва чиқиш шартларини, шунингдек, уларнинг мамлакат ҳудудида бўлиб туришини тартибга солувчи «кенг қамровли қонун лойиҳаси» ҳақида олдиндан эълон қилган эди. Хавфсизлик кенгашининг миграция масалаларига бағишланган мажлиси сентябрда ўтказилиши режалаштирилмоқда.