Yevropadagi qurg‘oqchilik so‘nggi yillarda kartoshka hosilini yaroqsiz ahvolga olib kelishi kutilmoqda. Bu kartoshka frisi kabi mahsulotlar narxini oshirishi mumkin. Bu haqda Reuters xabar bermoqda.
Yevropada kartoshka yetishtirishga ixtisoslashgan eng yirik xo‘jaliklar Germaniya, Fransiya, Niderlandiya va Belgiyada mavjud. Ushbu mamlakatlardagi qurg‘oqchilik Yevropa Ittifoqida mahsulot yetishtirishni eng past darajaga tushiradi.
Germaniyadagi kartoshka yetishtiruvchilardan biri qurg‘oqchilik tufayli hosilning yarmi boy berilishi mumkinligini va hozir bunga yomg‘ir ham yordam berolmasligini aytmoqda.
Germaniya Qishloq xo‘jaligi vazirligi hosil prognozi haqida gapirishga jur’at etmadi, lekin kartoshka hosili istiqbollari “keskin yomonlashgani”ni aytdi.
Fransiyalik ishlab chiqaruvchilar guruhi — UNPT ma’lumotlariga ko‘ra, Fransiyada hosildorlik 20 yillik o‘rtacha ko‘rsatkichdan kamida 20 foizga past bo‘lishi mumkin.
Qayd etilishicha, kartoshka mahsulotlari, masalan, kartoshka frisini ishlab chiqaruvchilar energiya qimmatlashuvi sabab, narxlarni oshirib yuborishgan va bu yil hosil pastligi narxlarni yanada oshiradi. Misol uchun, McDonald’s restoranlar tarmog‘i xomashyo narxi oshishiga javoban, narxlarni hozirdanoq oshirgan.
Yevropa Ittifoqi qo‘shma tadqiqot markazi ekspertlari tahliliga ko‘ra, 2022-yilda Yevropada so‘nggi 500 yildagi eng yomon qurg‘oqchilik kuzatilmoqda.
Shu sababli qishloq xo‘jaligi sektori eng ko‘p zarar ko‘ryapti. Kartoshkadan tashqari, Yevropa Ittifoqidagi boshqa bir qancha ekinlar ham qattiq aziyat chekdi, so‘nggi ma’lumotlarga ko‘ra, donli ekinlarning prognoz qilingan hosildorligi 5 yillik o‘rtacha ko‘rsatkichdan 16 foiz, makkajo‘xoriniki esa 15 foiz pastdir.
Izoh (0)