Европадаги қурғоқчилик сўнгги йилларда картошка ҳосилини яроқсиз аҳволга олиб келиши кутилмоқда. Бу картошка фриси каби маҳсулотлар нархини ошириши мумкин. Бу ҳақда Reuters хабар бермоқда.
Европада картошка етиштиришга ихтисослашган энг йирик хўжаликлар Германия, Франция, Нидерландия ва Бельгияда мавжуд. Ушбу мамлакатлардаги қурғоқчилик Европа Иттифоқида маҳсулот етиштиришни энг паст даражага туширади.
Германиядаги картошка етиштирувчилардан бири қурғоқчилик туфайли ҳосилнинг ярми бой берилиши мумкинлигини ва ҳозир бунга ёмғир ҳам ёрдам беролмаслигини айтмоқда.
Германия Қишлоқ хўжалиги вазирлиги ҳосил прогнози ҳақида гапиришга журъат этмади, лекин картошка ҳосили истиқболлари «кескин ёмонлашгани»ни айтди.
Франциялик ишлаб чиқарувчилар гуруҳи — УНПТ маълумотларига кўра, Францияда ҳосилдорлик 20 йиллик ўртача кўрсаткичдан камида 20 фоизга паст бўлиши мумкин.
Қайд этилишича, картошка маҳсулотлари, масалан, картошка фрисини ишлаб чиқарувчилар энергия қимматлашуви сабаб, нархларни ошириб юборишган ва бу йил ҳосил пастлиги нархларни янада оширади. Мисол учун, McDonald’s ресторанлар тармоғи хом ашё нархи ошишига жавобан, нархларни ҳозирданоқ оширган.
Европа Иттифоқи қўшма тадқиқот маркази экспертлари таҳлилига кўра, 2022 йилда Европада сўнгги 500 йилдаги энг ёмон қурғоқчилик кузатилмоқда.
Шу сабабли қишлоқ хўжалиги сектори энг кўп зарар кўряпти. Картошкадан ташқари, Европа Иттифоқидаги бошқа бир қанча экинлар ҳам қаттиқ азият чекди, сўнгги маълумотларга кўра, донли экинларнинг прогноз қилинган ҳосилдорлиги 5 йиллик ўртача кўрсаткичдан 16 фоиз, маккажўхориники эса 15 фоиз пастдир.
Изоҳ (0)