“O‘rikzor” savdo kompleksi buzilayotgani, sotuvchilarga mahsulotlarini sotib olishga 1 oy vaqt berishgani haqida xabarlar tarqaldi. Toshkent shahar hokimligi buni rad etdi.
Hokimlik uning tugatilishi, buzilishi, rekonstruksiya qilinishi haqidagi ma’lumotlar haqiqatga to‘g‘ri kelmasligini bildirdi.
“O‘rikzor savdo kompleksi” MCHJ hech qanday qurilish yoki qayta qurish ishlari munosabati bilan yopilmaydi. Majmua hududidagi barcha obyektlar belgilangan ish tartibida (haftasiga 7 kun, dam olish kunlarisiz) faoliyatini davom ettirmoqda, deyiladi rasmiy xabarda.
Poytaxt hokimligi tasdiqlanmagan, norasmiy xabarlarga ishonmaslikka chaqirdi.
Aprel oyida Toshkentdagi “Risoviy” bozori sotuvga qo‘yilgandi. Noyabr oyida esa “Askiya” bozori mulki va hududi 16,8 mln dollar narxda auksionga qo‘yilib, Xitoyning Sheng Ke-International kompaniyasiga sotilgandi.
Toshkent shahrining Yunusobod tumanidagi dehqon oziq-ovqat bozori to‘liq qayta qurilib, besh barobar kengaytiriladi, bir nechta hududlardan iborat zamonaviy savdo, biznes va dam olish markaziga aylantiriladi. Ularning birinchisi — ekobozor hududi 2025-yil oxirigacha ishga tushirilishi rejalashtirilgan.
Izoh (0)