Бразилия чакалакзорларида туб қабилалардан бирининг сўнгги вакили вафот этди. У 26 йил бутунлай ёлғиз яшаган

Бразилия чакалакзорларида маҳаллий туб қабилалардан бирининг сўнгги вакили вафот этди, у 26 йил давомида тўлиқ изоляцияда яшаган, деб ёзади Meduza.

Эркакнинг жасади 23 август куни ўзининг похолдан ясалган кулбаси ёнидаги тўр беланчакдан топилган — уни Ҳиндулар миллий фонди ҳукумат ташкилоти ходимлари аниқлаган, улар кўп йиллар давомида масофадан туриб эркакни кузатиб борган.

Дастлабки маълумотларга кўра, тахминан 60 ёшлардаги эркак табиий сабабларга кўра вафот этган, аммо ўлимнинг аниқ сабабини қайд этиш учун унинг жасади барибир ёриб кўрилади.

Ушбу эркак тегишли бўлган қабила 1970 йиллардан бошлаб плантаторлар томонидан йўқ қилинган. Бразилия қонунларига кўра, маҳаллий қабилалар яшайдиган ерлар дахлсиз ҳисобланади. Заминдорлар ва ноқонуний олтин изловчилар туб аҳолининг қирилиб кетишидан бевосита манфаатдордир — чунки шундай бўлган тақдирда, улар қабилаларнинг ҳудудларида фаолият олиб бориш имкониятига эга бўлади. Шунинг учун қабилалар мунтазам равишда ҳужумларга учрайди.

Эркак тааллуқли бўлган қабиланинг ҳудуди қарийб тўрт минг гектар майдонга эга бўлиб, унинг атрофида хусусий фермалар жойлашган эди. 1996 йилда ҳужум оқибатида эркакнинг омон қолган сўнгги олти қабиладоши ўлдирилгач, у бутунлай ёлғиз қолганди. Ўшандан буён Ҳиндулар миллий фонди агентлари унинг хавфсизлигини таъминлаш учун яширинча кузатув олиб борган.

Эркак ОАВларда «Ўрадаги одам» сифатида танилди: у ўзи яшириниши учун ёки ёввойи ҳайвонларни овлаш учун катта чуқурлар қазирди. Овдан ташқари, у термачилик билан шуғулланган, шунингдек, кичикроқ ер майдонларига маккажўхори ва папайя эккан, баъзан эса ўзига похолдан кулбалар ясаган. Ҳуқуқ ҳимоячилари иштирокида у ҳақда бир нечта фильмлар ишланган, бундан мақсад — Amazonия туб қабилаларининг йўқ қилиниши муаммосига эътибор қаратиш эди.

Эркак мансуб бўлган қабила номи, шунингдек, унинг аъзолари сўзлашган тил номаълум бўлиб қолди. У «мулоқотга киришмайдиган» қабила бўлиб, ҳукумат ва олимлар ҳеч қачон унинг аъзолари билан мулоқот қилишга уринмаган. Бу ҳиндуларнинг ўзлари учун хавфли бўлиши мумкин эди: хусусан, кўпчилик кенг тарқалган инфекцияларга нисбатан иммунитети бўлмагани сабабли, улар бошқа одамлар учун анчадан буён жиддий хавф туғдирмайдиган касалликлардан вафот этиши мумкин. Бундай гуруҳларни олимлар узоқдан туриб кузатади, улар ҳақидаги маълумотни ҳам яккаланиш даражаси унча кучли бўлмаган ва мунтазам равишда ҳукумат билан алоқада бўлувчи бошқа қабилалар вакилларидан олади.

Бразилия чакалакзорларида жами 240 га яқин қабилалар мавжуд.