Suv xo‘jaligi vazirligi Aydar—Arnasoy ko‘l tizimini ishonchli boshqaruvga o‘tkazish bo‘yicha tanlov e’lon qildi. Bu haqda Davlat aktivlarini boshqarish agentligi xabar berdi.
Tanlovda ustav kapitalida davlat ulushi bo‘lmagan mahalliy korxonalar ishtirok etishi mumkin.
Ariza beruvchi noyob baliq turlarini ko‘paytirish va baliqni qayta ishlash texnologiyasi bo‘yicha tajribaga ega bo‘lishi kerak.
Bundan tashqari, 2022—2026-yillar davomida quyidagilarni amalga oshirish talabi yuklatiladi:
- kamida 30 mln AQSH dollari miqdorida investitsiya kiritish;
- ko‘llar tizimidan yillik baliq ovlash hajmlarini 15 ming tonnagacha yetkazish hamda okeanik qafas (sadok) moslamalarini o‘rnatish orqali qo‘shimcha 5 ming tonna baliq yetishtirish;
- ko‘llar tizimining “Tuzkon” ko‘li hududida “Baliq ishlab chiqarish” kompleksi tashkil etish va ushbu kompleksda yiliga 3 ming tonna baliqni qayta ishlash korxonasini ishga tushirish;
- hududdagi turizm salohiyatini oshirib, uning imkoniyatlaridan samarali foydalangan holda havaskor va sport baliq ovi turizmini kengaytirish, sayyohlarga xizmat ko‘rsatish hajmini oshirish;
- ko‘llar tizimining biologik xilma-xilligini saqlash, baliq zaxiralarini ilmiy yondashgan holda ko‘paytirish;
- xorijiy mutaxassislarni jalb qilgan holda, ko‘llar tizimida sho‘r suvda baliq zaxiralarini ko‘paytirish bo‘yicha laboratoriya markazini tashkil etish;
- ko‘llar tizimi hududidagi kollektor-drenaj tarmoqlarini to‘liq tozalash.
Agar shartnomadagi barcha talablar bajarilsa, ishonchli boshqaruv 49 yilga (2071-yilgacha) uzaytiriladi.
Tanlovda ishtirok etish uchun talabgor 7-sentabr soat 16:00 gacha ariza yuborishi kerak.
Izoh (0)