“O‘zbekiston shampani”ni xususiylashtirish jarayoni qayta boshlandi. Bu haqda Davlat aktivlarini boshqarish agentligi xabar berdi.
2021-yil 9-iyulda “O‘zbekiston shampani” ustav kapitalidagi 51,48 foiz aksiyalar paketi xalqaro konsalting kompaniyasi — KPMG kompaniyasini jalb etgan holda xususiylashtirish jarayonlari amalga oshirilgan.
O‘tkazilgan ochiq xususiylashtirish jarayonlari natijasi bo‘yicha narx va shartnomaning boshqa talablari bo‘yicha eng maqbul bo‘lgan talabgor tanlov g’olibi deb topilgan. Biroq tanlov g’olibi tomonidan tegishli oldi-sotdi shartnomasi imzolanmagan.
Shunga ko‘ra, Davlat tender komissiyasining tegishli qaroriga asosan, dastlabki savdo jarayonlari natijalarini bekor qilish va savdo jarayonlarini qaytadan boshlash yuzasidan tegishli qaror qabul qilingan.
Shunga ko‘ra, "O‘zbekiston shampani” ustav kapitalidagi 51,48 foiz aksiyalar paketini raqobatga asoslangan sotuv jarayoni orqali sotish jarayonini davom ettirish rejasi e’lon qilindi.
Sotuv jarayonlari uchun arizalar 2022-yil 30-sentabr kuni soat 18:00 ga qadar elektron qabul qilinadi.
Kompaniya haqida ma’lumot
“O‘zbekiston shampani” Toshkent shahrida joylashgan bo‘lib, 1942-yilda ishga tushirilgan.
Kompaniyaning asosiy faoliyat turi shampan va boshqa gazlangan sharob ichimliklarini ishlab chiqarish, shuningdek sharob materiallariga ishlov berishdan iborat.
2021-yil yakuniga ko‘ra, kompaniyaning sof tushumi 65,6 mlrd so‘mni, sof foydasi 2 mlrd so‘mni hamda sof aktivi 12 mlrd so‘mni tashkil etgan.
Avvalroq O‘zbekistondagi avtomobil bo‘yoqlari ishlab chiqaruvchi kompaniya xususiylashtirilayotgani haqida xabar berilgandi.
Izoh (0)