Moderna биотехнологик компанияси Pfizer ва BioNTech компанияларига нисбатан судга даъво киритганини эълон қилди. Moderna уларни коронавирусга қарши қўшма вакцинасини яратишда тегишли лицензия бўлмаган ҳолда, патентланган технологиялардан фойдаланишда айблади, деб ёзади Meduza.
«Ўзимиз миллиардлаб доллар сармоя киритиб, пандемиядан анча аввал патентлаган мРНК-вакциналарнинг инновацион технологик платформасини ҳимоя қилиш учун бу даъволарни киритдик. Pfizer ва BioNTech Moderna технологиясининг иккита асосий хусусиятини ноқонуний кўчириб олган ва улардан рухсатсиз фойдаланишда давом этмоқда, деб ҳисоблаймиз», — дейилади компания баёнотида.
Пресс-релизга мувофиқ, 2020 йил октябрида Moderna COVID-19 билан боғлиқ патентларини пандемия даврида қўлламаслик мажбуриятини олган эди, бироқ 2022 йил мартида касалланиш билан боғлиқ вазият юмшаб, вакциналар танқислиги йўқолганидан экйин ўз шартларини янгилади. Хусусан, компания паст ва ўрта даромад даражасига эга 92 та мамлакатга етказиб берилаётган коронавирус вакциналарига нисбатан ўз патент ҳуқуқларига риоя этилишини талаб қилмасликни ўз зиммасига олди, аммо бошқа бозорларга нисбатан эса компания Pfizer ва BioNTech патентланган технологиялардан фойдаланишга тижорий лицензия сотиб олиш имкониятини кўриб чиқишини кутганди.
Шу билан бирга, дея қайд этилади пресс-релизда, Moderna Comirnaty (Pfizer ва BioNTech’нинг коронавирусга қарши вакцинаси номи) вакцинаси бозордан олиб ташланишига эришмоқчи эмас, паст ва ўрта даражадаги даромадли 92 та мамлакатга вакциналар етказиб берилгани юзасидан, шунингдек, 2022 йил 8 мартгача амалга оширилган фаолият учун зарарларни қоплашни талаб қилмайди.
Spikevax — Moderna компанияси томонидан ишлаб чиқилган вакцина коронавирусга қарши энг кенг тарқалган вакциналардан бири ҳисобланади. Comirnaty билан бир қаторда у АҚШда вакцинация стратегиясининг асосини ташкил қилган. 26 август ҳолатига АҚШда 360 миллион дозадан ортиқ Pfizer/BioNTech вакцинаси ва 229 миллион дозадан зиёд Moderna вакцинаси қўлланилган.
Изоҳ (0)