Shanxay hamkorlik tashkilotining 15—16-sentyabr kunlari Samarqandda o‘tkaziladigan sammitida 8 ta davlatdan tashqari, Belarus, Eron va Mongoliya kuzatuvchi, Turkiya va Turkmaniston maxsus taklif qilingan mehmon sifatida ishtirok etadi. Bu haqda 26-avgust kuni O‘zbekistonning SHHT ishlari bo‘yicha milliy koordinatori Rahmatilla Nurimbetov ishtirokida o‘tkazilgan brifingda ma’lum qilindi, deb xabar bermoqda “Daryo” muxbiri.
Rahmatilla Nurimbetovning aytishicha, bugungi kundagi eng dolzarb tashqi siyosiy masalalardan biri O‘zbekistonning SHHTdagi raisligi va Samarqand sammiti doirasida olib borilayotgan ishlar hisoblanadi.
Birinchi navbatda, yaqinlashib kelayotgan Samarqand sammiti. Biz bugunga kelib yakunlovchi pallaga yetib keldik. So‘nggi yillarda SHHTning sammitlari onlayn shaklda o‘tkazilgan edi. Samarqand sammiti esa odatiy formatda o‘tishi kutilmoqda. Bugungi kunda 8 ta davlat rahbarlari sammitda qatnashishni tasdiqlashgan. Bundan tashqari, SHHTda kuzatuvchi davlatlar ham mavjud. Ular orasidan uchtasi Belarus, Eron va Mongoliya davlat rahbarlari ham ishtirok etishi tasdiqlangan.Bundan tashqari, SHHTda yaxshi an’ana bor. Bu raislik qiluvchi tomon mehmon taklif qilishi mumkin. Raislik qiluvchi davlat rahbari tashabbus bilan chiqishi mumkin, muhim sherik bo‘lgan davlat rahbarlarini ham taklif qilishi mumkin. Bugungi kunda Turkiya va Turkmaniston kabi davlatlarning ishtiroki tasdiqlandi. Bundan tashqari, bir nechta davlatlar ham qiziqmoqda.
Dushanbe sammitida prezident Shavkat Mirziyoyev SHHTga raisligimiz doirasidagi ustuvor yo‘nalishlarni belgilab bergan. Shundan so‘ng prezident darajasida maxsus reja ishlab chiqildi. Bu rejaga muvofiq 80 dan ortiq yirik tadbirlar o‘tkazildi. Aytish mumkin, bularning hammasi muvaffaqiyatli o‘tkazildi.
Raisligimiz doirasida turli sohalarga oid 15 ga yaqin hujjatlar ishlab chiqildi va ular Samarqand sammitida qabul qilinishi kutilmoqda. Bundan tashqari, 30 yaqin hujjatlar tomonlar bilan kelishilgan. Sentyabr oyida milliy koordinatorlar kengashi yig‘ilishadi. Bu yig‘ilish natijalariga ko‘ra, albatta, yangi hujjatlar kelishib olinishi kutilmoqda.
O‘zbekistonning SHHT ishlari bo‘yicha milliy koordinatori Rahmatilla Nurimbetov
Izoh (0)