Farg‘ona viloyatida o‘zini IIB va bank xodimi sifatida tanishtirgan shaxs ushlandi. Bu haqda Iqtisodiy jinoyatlarga qarshi kurashish departamenti axborot xizmati xabar berdi.
Qayd etilishicha, Bosh prokuratura huzuridagi departamentning Farg‘ona viloyati boshqarmasi tomonidan IIB xodimlari bilan hamkorlikda tezkor tadbir o‘tkazilgan. Unda fuqaro N.X. fuqaro M.ga o‘zini Toshkent shahri IIB xodimi deb tanishtirib, sud organlarida ishi ko‘rilayotgan turmush o‘rtog‘i B.ni 1500 dollar evaziga ozodlikka chiqarib berishni va’da qilib, shundan 1000 dollarni olib, yana 500 dollarni olgan vaqtida ashyoviy dalillar bilan ushlangan.
Bundan tashqari, N.X. boshqa bir fuqaro N.Q.ga Toshkent shahrida bank filialida ishlashini aytib, imtiyozli shartlar asosida kredit olib berish evaziga uning 4,9 million so‘mini qo‘lga kiritgani aniqlangan.
Mazkur holat yuzasidan Jinoyat kodeksining 168-moddasi (firibgarlik) bilan jinoyat ishi qo‘zg‘atilib, tergov harakatlari o‘tkazilmoqda.
Izoh (0)