Shavkat Mirziyoyev Jo‘qorg‘i Kengesning navbatdan tashqari 34-sessiyasida Qoraqalpog‘iston xalqining og‘irini yengil qilishga qaratilgan ishlarni bundan keyin ham davom ettirilishini aytdi.
“Hammangiz guvohsiz, bugun shiddat bilan o‘zgarib borayotgan hayot oldimizga yangi-yangi vazifalarni qo‘ymoqda. Biz zamon talablaridan kelib chiqib, kelgusida sizlar bilan birgalikda Qoraqalpog‘istonda yana ko‘plab katta-katta ishlarni amalga oshiramiz”, — degan prezident.
Uning ta’kidlashicha, bu yangilanishlarni qoraqalpoq xalqi sezishi kerak. Eski usullar bilan Qoraqalpog‘istonda ishlab bo‘lmaydi.
“Xudo xohlasa, hayotning har qanday sinov va mashaqqatlariga bardosh berib, ertangi kunga katta ishonch bilan yashayotgan mard va matonatli Qoraqalpog‘iston xalqining og‘irini yengil, mushkulini oson qilishga qaratilgan bu ezgu va xayrli ishlarni bundan keyin ham izchil davom ettiramiz”, — deya so‘zlarini yakunlagan davlat rahbari.
Jo‘qorg‘i Kenges sessiyasida qanday masalalar ko‘rildi?
26-avgust kuni bo‘lib o‘tgan Jo‘qorg‘i kengesning navbatdan tashqari 34-sessiyasida davlat rahbarining kirish so‘zidan so‘ng Oqsoqollar kengashining qaroriga muvofiq Jo‘qorg‘i Kenges Raisi lavozimiga tavsiya etilgan Amanbay Orinbayev Murat Kamalov o‘rniga Qoraqalpog‘iston Jo‘qorg‘i Kengesi raisi lavozimiga tasdiqlandi.
Sessiyada prezident shuncha sa’y-harakatlarga, Qoraqalpog‘istonga ajratilayotgan katta-katta mablag‘larga qaramay, aholi kayfiyatiga salbiy ta’sir qilayotgan muammolar saqlanib qolayotganini qayd etdi. Davlat rahbari mutasaddi vazirlik va idoralar rahbarlariga Qoraqalpog‘istonda qo‘shimcha imtiyoz va yengilliklar berish bo‘yicha aniq topshiriqlar berdi.
Jumladan, Qoraqalpog‘istonda tadbirkorlikni rivojlantirish maqsadida hudud uchun foyda solig‘i stavkasini 15 foizdan 7,5 foizga tushirish, aylanma soliq stavkasini Nukus shahrida 4 foizdan 2 foizga, tumanlarda 2 foizdan 1 foizga, olis hududlarda esa 1 foizdan 0,5 foizga pasaytirish, mol-mulk va yer solig‘i stavkalarini 2 baravarga kamaytirish bo‘yicha qaror loyihasini kiritishni topshirdi.
Qoraqalpog‘istonda sanoat loyihalarini ko‘paytirish maqsadida Investorlarga ko‘mak markazi qoshida Nukus shahridagi 10 gektar yer maydonida Sanoat texnoparkini tashkil etish, 5 yil muddatga faqat Qoraqalpog‘iston tadbirkorlariga eksport mahsulotlarini ishlab chiqarish uchun sotib olingan xom ashyolarni, O‘zbekiston bo‘ylab tashishda 70 foiz transport xarajatlarini qoplab berish tizimini yo‘lga qo‘yish va boshqa topshiriqlar berildi.
Ta’limni rivojlantirish va yoshlarni qo‘llab-quvvatlash bo‘yicha takliflaridan kelib chiqib qoraqalpog‘istonlik yoshlar uchun O‘zbekistondagi barcha OTMlarda alohida 6,5 mingta qabul kvotalari joriy etish vazifasi topshirildi.
Qoraqalpog‘istonda bog‘cha, maktab va tibbiyot muassasalari qurilishiga qo‘shimcha 5 trillion so‘m ajratiladigan bo‘ldi.
2025-yilgacha qo‘shilgan qiymat solig‘i bo‘yicha rejadan oshirib bajarilgan tushumlar Qoraqalpog‘iston budjetida qoldirish bo‘yicha topshiriqlar berilgan. Qoraqalpog‘istonda aholi uchun yakka tartibdagi uy-joy qurish maqsadida yer uchastkasi taqdim etish bo‘yicha takliflar ishlab chiqish vazifasi ham qo‘yilgan.
Infratuzilmani rivojlantirish maqsadida Qoraqalpog‘istonning har bir shahri va tumanida Ichki yo‘llarni ta’mirlash uchastkalari tashkil etish, ularga yetarli shtat, zarur mablag‘ va texnikalar ajratiladi. Ikki oy muddatda Qoraqalpog‘istonda xalqaro va ichki avtomobil yo‘llarini rivojlantirish bo‘yicha alohida dastur ishlab chiqiladi.
Izoh (0)