Шанхай ҳамкорлик ташкилотининг 15—16-сентябр кунлари Самарқандда ўтказиладиган саммитида 8 та давлатдан ташқари, Беларусь, Эрон ва Монголия кузатувчи, Туркия ва Туркманистон махсус таклиф қилинган меҳмон сифатида иштирок этади. Бу ҳақда 26 август куни Ўзбекистоннинг ШҲТ ишлари бўйича миллий координатори Раҳматилла Нуримбетов иштирокида ўтказилган брифингда маълум қилинди, деб хабар бермоқда «Дарё» мухбири.
Раҳматилла Нуримбетовнинг айтишича, бугунги кундаги энг долзарб ташқи сиёсий масалалардан бири Ўзбекистоннинг ШҲТдаги раислиги ва Самарқанд саммити доирасида олиб борилаётган ишлар ҳисобланади.
Биринчи навбатда, яқинлашиб келаётган Самарқанд саммити. Биз бугунга келиб якунловчи паллага етиб келдик. Сўнгги йилларда ШҲТнинг саммитлари онлайн шаклда ўтказилган эди. Самарқанд саммити эса одатий форматда ўтиши кутилмоқда. Бугунги кунда 8 та давлат раҳбарлари саммитда қатнашишни тасдиқлашган. Бундан ташқари, ШҲТда кузатувчи давлатлар ҳам мавжуд. Улар орасидан учтаси Беларусь, Эрон ва Монголия давлат раҳбарлари ҳам иштирок этиши тасдиқланган.Бундан ташқари, ШҲТда яхши анъана бор. Бу раислик қилувчи томон меҳмон таклиф қилиши мумкин. Раислик қилувчи давлат раҳбари ташаббус билан чиқиши мумкин, муҳим шерик бўлган давлат раҳбарларини ҳам таклиф қилиши мумкин. Бугунги кунда Туркия ва Туркманистон каби давлатларнинг иштироки тасдиқланди. Бундан ташқари, бир нечта давлатлар ҳам қизиқмоқда.
Душанбе саммитида президент Шавкат Мирзиёев ШҲТга раислигимиз доирасидаги устувор йўналишларни белгилаб берган. Шундан сўнг президент даражасида махсус режа ишлаб чиқилди. Бу режага мувофиқ 80 дан ортиқ йирик тадбирлар ўтказилди. Айтиш мумкин, буларнинг ҳаммаси муваффақиятли ўтказилди.
Раислигимиз доирасида турли соҳаларга оид 15 га яқин ҳужжатлар ишлаб чиқилди ва улар Самарқанд саммитида қабул қилиниши кутилмоқда. Бундан ташқари, 30 яқин ҳужжатлар томонлар билан келишилган. Сентябр ойида миллий координаторлар кенгаши йиғилишади. Бу йиғилиш натижаларига кўра, албатта, янги ҳужжатлар келишиб олиниши кутилмоқда.
Ўзбекистоннинг ШҲТ ишлари бўйича миллий координатори Раҳматилла Нуримбетов
Изоҳ (0)