Jizzaxda fuqaroning shaxsiy fotosuratlarini internetda tarqatish bilan qo‘rqitib, undan pul talab qilgan ayol ushlandi

Jizzax viloyati G‘allaorol tumanida fuqaro suratlarini montaj qilib, tarqatish bilan qo‘rqitgan ayol ushlandi.

Ma’lum bo‘lishicha, G‘allaorol tumani Saroy qishlog‘ida doimiy ro‘yxatda turib, Zafarobod tumanida vaqtincha yashab kelgan ayol internetdan Sharof Rashidov tumani “Saroylik” mahallasida yashovchi yigitning fotosuratlarini ko‘chirib olgan. So‘ng ularni montaj qilib, ijtimoiy tarmoqlarda e’lon qilishini aytib qo‘rqitgan va yigitdan 5 million so‘m talab qilgan.

Jizzax viloyati IIB axborot xizmatining xabar berishicha, IIB xodimlari tomonidan o‘tkazilgan tezkor tadbirda ayol yigitdan talab qilgan pullarini Jizzax shahrida olayotganda daliliy ashyolar bilan ushlangan.

Holat yuzasidan jinoyat ishi qo‘zg‘atilib, hozirda tergov-surishtiruv ishlari olib borilmoqda.