“Atletiko” Grizmanni “Barselona”dan sotib olishga majbur bo‘lmaslik uchun uni mavsum davomida asosiy tarkibda tushirmasligi mumkin

Antuan Grizman bundan buyon “Atletiko”ning asosiy tarkibida maydonga tushmasligi mumkin.

Madrid klubi mart oyida 32 yoshga kiradigan futbolchini 40 million yevro evaziga “Barselona”dan sotib olishni xohlamayapti.

Agarda fransuz 2 yillik ijara muddati davomida jamoaning 50% o‘yinlarida kamida 45 daqiqani maydonda o‘tkazsa “Atletiko” kataloniyaliklarga 40 millionni to‘lab berishi lozim bo‘ladi.

2021/22-yilgi mavsumda Antuan ushbu kriteriyaning 81 foizini bajardi (37 o‘yinning 30 tasida maydonda 45 daqiqadan ko‘p vaqt o‘tkazdi). Joriy mavsum esa shartnomadagi band faollashishi uchun unga bir nechta o‘yin kifoya qiladi. “Atletiko” buni tushunib turibdi va bosh murabbiy Diyego Simeoneni ham ogohlantirdi.

Agarda 40 million yevrolik xarid amalga oshsa, “matraschilar” Antuan bilan 2 yillik shartnoma imzolashi va soliqlardan tashqari yiliga 12 million yevro maosh belgilashi kerak bo‘ladi.

Yozda “Atletiko” Grizmanni “Barselona”ga qaytarishga urinib ko‘rdi. Biroq Madrid klubi qaytarish pulini to‘lashga tayyor bo‘lsa-da, “ko‘k-anorranglilar” bu taklifni rad etdi. “Matraschilar” taklif qilgan pul “Barselona” Antuanga to‘laydigan maoshdan kam edi. Grizmann kataloniyaliklar safida soliqlardan tashqari yiliga 16 million yevro maosh olardi.

COPE’ning xabar berishicha, “Barselona” vaziyatni kuzatmoqda va qoida buzilishi mumkinligini hisobga olib, yuristlarga murojaat qilgan.

La Liganing dastlabki 2 o‘yinida Antuan maydonda 62 daqiqa o‘tkazdi va bitta golni o‘z hisobiga yozdirib qo‘ydi.