«Атлетико» Гризманни «Барселона»дан сотиб олишга мажбур бўлмаслик учун уни мавсум давомида асосий таркибда туширмаслиги мумкин

Антуан Гризман бундан буён «Атлетико»нинг асосий таркибида майдонга тушмаслиги мумкин.

Мадрид клуби март ойида 32 ёшга кирадиган футболчини 40 миллион евро эвазига «Барселона»дан сотиб олишни хоҳламаяпти.

Агарда француз 2 йиллик ижара муддати давомида жамоанинг 50% ўйинларида камида 45 дақиқани майдонда ўтказса «Атлетико» каталонияликларга 40 миллионни тўлаб бериши лозим бўлади.

2021/22 йилги мавсумда Антуан ушбу критериянинг 81 фоизини бажарди (37 ўйиннинг 30 тасида майдонда 45 дақиқадан кўп вақт ўтказди). Жорий мавсум эса шартномадаги банд фаоллашиши учун унга бир нечта ўйин кифоя қилади. «Атлетико» буни тушуниб турибди ва бош мураббий Диего Симеонени ҳам огоҳлантирди.

Агарда 40 миллион евролик харид амалга ошса, «матрасчилар» Антуан билан 2 йиллик шартнома имзолаши ва солиқлардан ташқари йилига 12 миллион евро маош белгилаши керак бўлади.

Ёзда «Атлетико» Гризманни «Барселона»га қайтаришга уриниб кўрди. Бироқ Мадрид клуби қайтариш пулини тўлашга тайёр бўлса-да, «кўк-анорранглилар» бу таклифни рад этди. «Матрасчилар» таклиф қилган пул «Барселона» Антуанга тўлайдиган маошдан кам эди. Гризманн каталонияликлар сафида солиқлардан ташқари йилига 16 миллион евро маош оларди.

COPE’нинг хабар беришича, «Барселона» вазиятни кузатмоқда ва қоида бузилиши мумкинлигини ҳисобга олиб, юристларга мурожаат қилган.

Ла Лиганинг дастлабки 2 ўйинида Антуан майдонда 62 дақиқа ўтказди ва битта голни ўз ҳисобига ёздириб қўйди.