Andijon viloyatida 2022-yilning o‘tgan olti oyi davomida 19 ta qotillik jinoyati sodir etilgan bo‘lib, ularning sakkiztasiga oilaviy kelishmovchiliklar sabab bo‘lgan. Bu haqda viloyat IIB boshlig‘i o‘rinbosari Isomiddin Ismonov Xalq deputatlari Andijon viloyati kengashi deputatlariga qilgan hisobotida ma’lum qildi, deya xabar berdi “Daryo” muxbiri.
Qayd etilishicha, sodir etilgan qotilliklar nizo, oilalar o‘rtasida bir-birini tushunmaslik, shuningdek, sodir etilishi mumkin bo‘lgan jinoyatlarning oldini olish borasida yetarli darajada profilaktik chora-tadbirlar olib borilmaganligi oqibatida kelib chiqmoqda.
Qotillik jinoyatlari tahlil qilinganida ularning 8 tasi ko‘p yillardan buyon hal etilmagan oilaviy kelishmovchilik, 6 tasi bir necha yillik o‘zaro adovat, 2 tasi oldi-berdi, 1 tasi rashk, 1 tasi esa ruhiy zo‘riqish natijasida sodir etilganligi aniqlangan.
Misol uchun, joriy yilning 19-iyun kuni Andijon shahrida yashovchi fuqaro S.D.ning ikki nafar, ya’ni 2011-yil va 2014-yil tug‘ilgan farzandlarining jasadi u yashayotgan uyning yerto‘lasidan topilgan. Mazkur qotillik jinoyati D.S.ning yaqin qarindoshi 1995-yilda tug‘ilgan ayol tomonidan o‘zaro kelishmovchilik zamirida sodir etilgan, — deydi IIB boshlig‘i o‘rinbosari.Ta’kidlanishicha, yuqoridagi holatga bee’tibor bo‘lingani sababli ayrim ichki ishlar organlari xodimlariga nisbatan xizmat tekshiruvi olib borilgan. Natijada hududiy profilaktika inspektori, katta serjant S.I. egallab turgan lavozimida qisqa fursat ishlaganligi sababli qattiq ogohlantirilgan, profilaktika katta inspektori mayor I.Q.ga hayfsan, 4-sonli IIB boshlig‘i mayor M.S.ga tanbeh intizomiy jazosi berilgan.
Shuningdek, Andijon shahar ichki ishlar organlari faoliyatini muvofiqlashtirish boshqarmasi boshlig‘ining o‘rinbosari — Jamoat xavfsizligi xizmati boshlig‘iga nisbatan oylik maoshining 30 foizi miqdorida jarima jazosi tayinlangan, — deydi mas’ul.
Izoh (0)