Андижон вилоятида 2022 йилнинг ўтган олти ойи давомида 19 та қотиллик жинояти содир этилган бўлиб, уларнинг саккизтасига оилавий келишмовчиликлар сабаб бўлган. Бу ҳақда вилоят ИИБ бошлиғи ўринбосари Исомиддин Исмонов Халқ депутатлари Андижон вилояти кенгаши депутатларига қилган ҳисоботида маълум қилди, дея хабар берди «Дарё» мухбири.
Қайд этилишича, содир этилган қотилликлар низо, оилалар ўртасида бир-бирини тушунмаслик, шунингдек, содир этилиши мумкин бўлган жиноятларнинг олдини олиш борасида етарли даражада профилактик чора-тадбирлар олиб борилмаганлиги оқибатида келиб чиқмоқда.
Қотиллик жиноятлари таҳлил қилинганида уларнинг 8 таси кўп йиллардан буён ҳал этилмаган оилавий келишмовчилик, 6 таси бир неча йиллик ўзаро адоват, 2 таси олди-берди, 1 таси рашк, 1 таси эса руҳий зўриқиш натижасида содир этилганлиги аниқланган.
Мисол учун, жорий йилнинг 19 июнь куни Андижон шаҳрида яшовчи фуқаро С.Д.нинг икки нафар, яъни 2011 йил ва 2014 йил туғилган фарзандларининг жасади у яшаётган уйнинг ертўласидан топилган. Мазкур қотиллик жинояти Д.С.нинг яқин қариндоши 1995 йилда туғилган аёл томонидан ўзаро келишмовчилик замирида содир этилган, — дейди ИИБ бошлиғи ўринбосари.Таъкидланишича, юқоридаги ҳолатга бееътибор бўлингани сабабли айрим ички ишлар органлари ходимларига нисбатан хизмат текшируви олиб борилган. Натижада ҳудудий профилактика инспектори, катта сержант С.I. эгаллаб турган лавозимида қисқа фурсат ишлаганлиги сабабли қаттиқ огоҳлантирилган, профилактика катта инспектори майор I.Қ.га ҳайфсан, 4-сонли ИИБ бошлиғи майор М.С.га танбеҳ интизомий жазоси берилган.
Шунингдек, Андижон шаҳар ички ишлар органлари фаолиятини мувофиқлаштириш бошқармаси бошлиғининг ўринбосари — Жамоат хавфсизлиги хизмати бошлиғига нисбатан ойлик маошининг 30 фоизи миқдорида жарима жазоси тайинланган, — дейди масъул.
Изоҳ (0)