So‘nggi oltmish yillikdagi eng kuchli jazirama va qurg‘oqchilik mamlakatning ikkinchi eng katta energiya manbai bo‘lgan gidroenergetikaga ta’sir qilgani sababli Xitoy yana ko‘mirga qaytmoqda. Bu haqda CNN xabar bermoqda.
Haddan tashqari issiqlik va kam yog‘ingarchilik tufayli mamlakat uchun muhim Yanszi daryosi qisman qurib qolgan.
Qurg‘oqchilik daryo bo‘yidagi oltita viloyatga, o‘n minglab odamlarning suv ta’minotiga ta’sir ko‘rsatdi va elektr ta’minotini saqlab qolish uchun ba’zi viloyatlardagi zavodlarni yopishga majbur qildi.
O‘zining boy suv resurslari bilan mashhur bo‘lgan va Xitoy gidroenergetikasining 21 foizini tashkil etuvchi Sichuan davlat tarmog‘iga ko‘ra, joriy oyda uning gidroelektr quvvati 50 foizga kamaydi.
Sichuan Xitoyning boshqa qismlarini elektr energiyasi bilan ta’minlagani sababli gidroenergetika tanqisligi mamlakat sharqidagi ko‘plab shaharlarga, shu jumladan, Shanxayga ham ta’sir ko‘rsatdi.
Energiya inqirozini yengillashtirishda Xitoy elektr energiyasini ishlab chiqarish uchun ko‘mir qazib olish va importni oshirmoqda.
Milliy taraqqiyot va islohotlar komissiyasining so‘nggi ma’lumotlariga ko‘ra, butun mamlakat bo‘ylab elektr stansiyalari avgust oyining birinchi ikki haftasida kuniga 8,16 million tonna ko‘mir yoqdi, bu o‘tgan yilga nisbatan 15 foizga ko‘p.
Xitoy endi elektr energiyasi uchun o‘tgan yilga qaraganda ko‘proq ko‘mirga tayanadi. Iyul oyida ko‘mirdan ishlab chiqarilgan elektr energiyasi iyun oyiga nisbatan 22 foizga o‘sdi, bu umumiy hajmning 69 foizini tashkil etdi.
O‘tgan yili ko‘mir quvvati Xitoyning elektr ta’minotining 67,4 foizini tashkil etgan.
Sichuanning eng yirik ko‘mir ishlab chiqaruvchisi Sichuan Coal Industry Group avgust oyining o‘rtalaridan beri termal ko‘mir qazib olish hajmini ikki baravar oshirib, kuniga qariyb 15 ming tonnaga yetkazib bergan.
Mintaqadagi eng yirik ko‘mir yoqilg‘isiga ega bo‘lgan Sichuan Guangan elektr stansiyasi ham shu oyda energiya ishlab chiqarishni o‘tgan yilning shu davriga nisbatan 170 foizga oshirdi.
Stansiya avgust oyida elektr energiyasi ishlab chiqarish o‘tgan yilga nisbatan 313 foizga o‘sishini kutmoqda.
G‘arb davlatlari Ukrainadagi urush munosabati bilan Rossiyadan uzoqlashayotgan bir paytda mamlakat boshqa davlatlardan, xususan, undan ham ko‘proq ko‘mir sotib olmoqda.
Bojxona statistikasi shuni ko‘rsatdiki, Xitoy o‘tgan oy Rossiyadan 7,42 million tonna ko‘mir olib kelgan, bu o‘tgan yilning shu davriga nisbatan 14 foizga ko‘p.
Gidroelektrik energiyaning qisqarishi mamlakatni ko‘mirga qaramligini oshirdi. Agar ekstremal ob-havo davom etsa, ko‘mir elektr stansiyalari qurilishi ko‘payishi mumkin, — dedi Guotai Jun’an Securitiyes brokerlik firmasi tahlilchilari.
Avvalroq Xitoyda ayanchli qurg‘oqchilik sabab yilning birinchi milliy ogohlantirishi e’lon qilingani haqida xabar berilgandi.
Izoh (0)