Сўнгги олтмиш йилликдаги энг кучли жазирама ва қурғоқчилик мамлакатнинг иккинчи энг катта энергия манбаи бўлган гидроэнергетикага таъсир қилгани сабабли Хитой яна кўмирга қайтмоқда. Бу ҳақда CNN хабар бермоқда.
Ҳаддан ташқари иссиқлик ва кам ёғингарчилик туфайли мамлакат учун муҳим Янсзи дарёси қисман қуриб қолган.
Қурғоқчилик дарё бўйидаги олтита вилоятга, ўн минглаб одамларнинг сув таъминотига таъсир кўрсатди ва электр таъминотини сақлаб қолиш учун баъзи вилоятлардаги заводларни ёпишга мажбур қилди.
Ўзининг бой сув ресурслари билан машҳур бўлган ва Хитой гидроэнергетикасининг 21 фоизини ташкил этувчи Сичуан давлат тармоғига кўра, жорий ойда унинг гидроэлектр қуввати 50 фоизга камайди.
Сичуан Хитойнинг бошқа қисмларини электр энергияси билан таъминлагани сабабли гидроэнергетика танқислиги мамлакат шарқидаги кўплаб шаҳарларга, шу жумладан, Шанхайга ҳам таъсир кўрсатди.
Энергия инқирозини енгиллаштиришда Хитой электр энергиясини ишлаб чиқариш учун кўмир қазиб олиш ва импортни оширмоқда.
Миллий тараққиёт ва ислоҳотлар комиссиясининг сўнгги маълумотларига кўра, бутун мамлакат бўйлаб электр станциялари август ойининг биринчи икки ҳафтасида кунига 8,16 миллион тонна кўмир ёқди, бу ўтган йилга нисбатан 15 фоизга кўп.
Хитой энди электр энергияси учун ўтган йилга қараганда кўпроқ кўмирга таянади. Июль ойида кўмирдан ишлаб чиқарилган электр энергияси июнь ойига нисбатан 22 фоизга ўсди, бу умумий ҳажмнинг 69 фоизини ташкил этди.
Ўтган йили кўмир қуввати Хитойнинг электр таъминотининг 67,4 фоизини ташкил этган.
Сичуаннинг энг йирик кўмир ишлаб чиқарувчиси Sichuan Coal Industry Group август ойининг ўрталаридан бери термал кўмир қазиб олиш ҳажмини икки баравар ошириб, кунига қарийб 15 минг тоннага етказиб берган.
Минтақадаги энг йирик кўмир ёқилғисига эга бўлган Sichuan Guangan электр станцияси ҳам шу ойда энергия ишлаб чиқаришни ўтган йилнинг шу даврига нисбатан 170 фоизга оширди.
Станция август ойида электр энергияси ишлаб чиқариш ўтган йилга нисбатан 313 фоизга ўсишини кутмоқда.
Ғарб давлатлари Украинадаги уруш муносабати билан Россиядан узоқлашаётган бир пайтда мамлакат бошқа давлатлардан, хусусан, ундан ҳам кўпроқ кўмир сотиб олмоқда.
Божхона статистикаси шуни кўрсатдики, Хитой ўтган ой Россиядан 7,42 миллион тонна кўмир олиб келган, бу ўтган йилнинг шу даврига нисбатан 14 фоизга кўп.
Гидроэлектрик энергиянинг қисқариши мамлакатни кўмирга қарамлигини оширди. Агар экстремал об-ҳаво давом этса, кўмир электр станциялари қурилиши кўпайиши мумкин, — деди Guotai Jun’an Securitiyes брокерлик фирмаси таҳлилчилари.
Аввалроқ Хитойда аянчли қурғоқчилик сабаб йилнинг биринчи миллий огоҳлантириши эълон қилингани ҳақида хабар берилганди.
Изоҳ (0)