Toshkent shahar hokimligi matbuot xizmati Jamoatchilik kengashi a’zolari tasdiqlab bo‘lingani haqidagi xabarga izoh berdi

Toshkent shahri hokimi Jahongir Ortiqxo‘jayev ishtirokida shahar deputatlar kengashi majlisi bo‘lib o‘tgani haqida xabar qilgandik.

Majlisda hokim Jamoatchilik kengashi a’zoligiga bir qator blogerlarni, jumladan, Nikita Makarenko, Aleksandra Ivanyujenko, Saodat Abduzakirova, Abu Ali Niyozmatovni taklif qildi.

Ammo hokimning qarori bilan Toshkent shahar Jamoatchilik kengashi a’zolari allaqachon tasdiqlab bo‘lingani ma’lum bo‘ldi.

Xususan, Ortiqxo‘jayevning 874-14-0-Q/22-sonli qarori bilan tasdiqlangan Kengash a’zolari 19 nafardan iborat va ularning safida hokim tilga olgan blogerlarning ism-sharifi yo‘q.

Mazkur masalaga oydinlik kiritish maqsadida “Daryo” Toshkent shahar hokimligi matbuot xizmati bilan bog‘landi.

Matbuot xizmatining xabar berishicha, qarordagi ro‘yxat yakuniy emas.

“Qarordagi ro‘yxatda Jamoatchilik kengashining doimiy a’zolari ism-shariflari keltirilgan. Bundan tashqari, Kengashga istalgan odam istalgan paytda a’zo bo‘lishi mumkin”, - deb xabar berdi Toshkent shahar hokimligi matbuot xizmati.