Ijtimoiy tarmoqlarda Surxondaryo viloyati hokimi To‘ra Bobolovning obuna bo‘yicha audiosi tarqaldi. Viloyat hokimligi bunga munosabat bildirdi.
Unda aytilishicha, 2022-yilda viloyat hokimi rahbarligida obuna masalasida yig‘ilish, uchrashuv o‘tkazilmagan. Mazkur audioyozuv 2021-yildagi yig‘ilishlardan montaj qilingan.
“Surxondaryo viloyati hokimligi ‘Surxon tongi’ va ‘Zarya Surxana’ gazetalariga muassis hisoblanadi. ‘Ommaviy axborot vositalari to‘g‘risida’gi qonunning 14-moddasida muassis zimmasiga yuklatilgan vazifalar qatorida o‘z muassisligidagi ommaviy axborot vositasining chiqarilishini ta’minlash ham bor.
Shuningdek, hududlardagi davlat muassasalariga o‘z sohasiga aloqador bosma nashrlarga yillik obuna uchun mablag‘ ham ajratiladi. Viloyat rahbari ‘majburiy’ so‘zini ishlatganida ana shu mablag‘ asosida obuna bo‘lishga e’tibor qaratgan.
‘Ixtiyoriy’ so‘zini esa o‘z mablag‘lari hisobidan o‘zlari istagan yoki qiziqib mutolaa qiladigan nashrga mustaqil obuna bo‘lishini nazarda tutgan”, — deyiladi hokimlik izohida.
Qayd etilishicha, ayni paytda viloyat hokimligi muassisligidagi “Surxon tongi” gazetasi 9430, “Zarya Surxana” gazetasi 1300 nusxada chop etilmoqda. Tahririyat ijodkorlari boshqa sohalar qatori ta’lim tizimi xodimlari, hurmatli ustoz va murabbiylar bilan yaqin hamkorlik asosida faoliyat yuritib, gazetalarning deyarli har bir sonida ta’limga oid hamda o‘qituvchi va murabbiylar qalamiga mansub maqolalarni ham chop etib kelmoqda.
“Shu o‘rinda, ijtimoiy tarmoq faollaridan pashshadan fil yasab, viloyat hokimining fikrlarini noto‘g‘ri talqin qilmaslikni, davriy bosma nashrlar obunasi haqida noo‘rin tushunchaga bormaslikni so‘ragan holda viloyat hokimligi bundan keyin ham barcha sohalar singari vohadagi matbuot va bosma davriy nashrlar faoliyatini qo‘llab-quvvatlashga tayyor ekanini ma’lum qilamiz”, — deyiladi xabarda.
Eslatib o‘tamiz, 18-avgust kuni ijtimoiy tarmoqlarda To‘ra Bobolovning Angor tumani prokurorini haqorat qilgani aytilgan audioyozuv ham tarqalgandi. Hokimlik audiomaterial 2022-yilning fevral oyida hokimlik soatidagi muhokamadan kesib olinganini bildirdi. Bosh prokuratura tarqatilgan audioyozuvlarning haqqoniyligi, qachon, qayerda va qanday holatlarda yuz berganligi hamda boshqa holatlar o‘rganilayotganini ma’lum qildi.
Izoh (0)