“Loyihadagi takliflar hayotiy va zarur ahamiyatga ega”. Deputatlar Senat rad etgan qonun loyihasini prezidentga yubormoqchi

Qonunchilik palatasi tomonidan 2022-yil 21-iyunda qabul qilingan va 4-avgustda Senat tomonidan rad etilgan “O‘zbekiston Respublikasining Oila kodeksiga o‘zgartirish kiritish to‘g‘risida”gi qonun loyihasini Qonunchilik palatasida qayta ko‘rib chiqishdan olib tashlab, Vazirlar Mahkamasiga yuborish haqidagi masalani deputatlarning ko‘pchiligi qo‘llab-quvvatlamadi. Bu haqda deputat Rasul Kusherbayev o‘zining Telegram kanalida yozmoqda.

Qayd etilishicha, deputatlar Senat rad etgan ushbu qonun loyihasi jamiyat uchun muhim va amaliyotda odamlar ortiqcha sarson bo‘lishining oldini oladi, deb hisoblamoqda. Bir qator deputatlar vakolatdan foydalanib, qonun loyihasini qayta qabul qilib, to‘g‘ridan to‘g‘ri prezidentga imzoga yuborish zarurligini bildirmoqda. Shu kungacha deputatlar bu vakolatdan foydalanmagan.

Qonun loyihasida:

FHDY organi tomonidan nikoh tuzishga bir oyda ruxsat beruvchi qoidani chiqarib tashlash;

• ellik yoshdan oshgan nikohlanuvchi shaxslar yoki o‘rtada bolasi bo‘lgan nikohlanuvchi shaxslar uchun, shuningdek, homilador ayol va uning tug‘ilajak bolasini o‘z bolasi deb tan oluvchi shaxs uchun tibbiy ko‘rikdan o‘tish ixtiyoriy ekanini belgilash ko‘zda tutilgan.