Toshkentda faoliyati tugatilgan 21-sonli mehribonlik uyi hududi ko‘pqavatli uylar qurishga berib yuborilmaydi. Bu haqda Milliy gvardiya matbuot xizmati ijtimoiy tarmoqlarda bildirilayotgan turli izohlarga javoban izoh berdi.
Ma’lum qilinishicha, 21-sonli mehribonlik uyi binosi va hududi Xalq ta’limi vazirligi balansida qoladi. Bu yerda bolalar muassasasi ham bo‘ladi. Uning turi va maqomi endilikda Xalq ta’limi vazirligi tomonidan belgilanadi. Bu yaqin kunlarda ma’lum bo‘ladi.
Respublikada bundan avval 13 ta mehribonlik uyi, 4 ta bolalar shaharchasi va 2 ta mehribonlik uyi (bolalar uyi) yopilgan edi. Ilgari yopilgan barcha ta’lim-tarbiya muassasalari Xalq ta’limi vazirligi balansida qolgan va ulardan faqat bolalar manfaatlarini ko‘zlab foydalanilmoqda.
Qayd etilishicha, ixtisoslashtirilgan maktab-internatlar ilgari mehribonlik uylariga qarashli bo‘lgan 6 ta obyektda joylashgan. Qo‘qon shahridagi sobiq 12-sonli mehribonlik uyi binosida ko‘zi ojiz bolalar uchun ixtisoslashtirilgan maktab-internati faoliyat ko‘rsatmoqda. Marg‘ilon shahrida 1-sonli mehribonlik uyi o‘rnida eshitish qobiliyati past va kar bolalar uchun ixtisoslashtirilgan maktab-internati foydalanishga topshirildi. Qolgan 4 ta mehribonlik uyida, shuningdek, Andijon viloyatidagi bolalar shaharchasida qanday bolalar muassasalari ochilishi bo‘yicha qarorlar qabul qilinmoqda.
4 ta yopiq bolalar shaharchasidan 2 tasida ixtisoslashtirilgan maktab-internatlari ham tashkil etiladi. Navoiy viloyatidagi bolalar shaharchasida esa prezident maktabi filiali ochiladi. Ilgari mehribonlik uylari (bolalar uyi) joylashgan binolar ham bolalar ehtiyojlari uchun topshirildi. Guliston shahrida uning o‘rnida imkoniyati cheklangan bolalar uchun tibbiy reabilitatsiya markazi ochildi. Farg‘ona shahrida bolalar davolash-reabilitatsiya markazi ish boshladi.
Mavzuga doir:
Izoh (0)