Тошкентда фаолияти тугатилган 21-сонли меҳрибонлик уйи ҳудуди кўпқаватли уйлар қуришга бериб юборилмайди. Бу ҳақда Миллий гвардия матбуот хизмати ижтимоий тармоқларда билдирилаётган турли изоҳларга жавобан изоҳ берди.
Маълум қилинишича, 21-сонли меҳрибонлик уйи биноси ва ҳудуди Халқ таълими вазирлиги балансида қолади. Бу ерда болалар муассасаси ҳам бўлади. Унинг тури ва мақоми эндиликда Халқ таълими вазирлиги томонидан белгиланади. Бу яқин кунларда маълум бўлади.
Республикада бундан аввал 13 та меҳрибонлик уйи, 4 та болалар шаҳарчаси ва 2 та меҳрибонлик уйи (болалар уйи) ёпилган эди. Илгари ёпилган барча таълим-тарбия муассасалари Халқ таълими вазирлиги балансида қолган ва улардан фақат болалар манфаатларини кўзлаб фойдаланилмоқда.
Қайд этилишича, ихтисослаштирилган мактаб-интернатлар илгари меҳрибонлик уйларига қарашли бўлган 6 та объектда жойлашган. Қўқон шаҳридаги собиқ 12-сонли меҳрибонлик уйи биносида кўзи ожиз болалар учун ихтисослаштирилган мактаб-интернати фаолият кўрсатмоқда. Марғилон шаҳрида 1-сонли меҳрибонлик уйи ўрнида эшитиш қобилияти паст ва кар болалар учун ихтисослаштирилган мактаб-интернати фойдаланишга топширилди. Қолган 4 та меҳрибонлик уйида, шунингдек, Андижон вилоятидаги болалар шаҳарчасида қандай болалар муассасалари очилиши бўйича қарорлар қабул қилинмоқда.
4 та ёпиқ болалар шаҳарчасидан 2 тасида ихтисослаштирилган мактаб-интернатлари ҳам ташкил этилади. Навоий вилоятидаги болалар шаҳарчасида эса президент мактаби филиали очилади. Илгари меҳрибонлик уйлари (болалар уйи) жойлашган бинолар ҳам болалар эҳтиёжлари учун топширилди. Гулистон шаҳрида унинг ўрнида имконияти чекланган болалар учун тиббий реабилитация маркази очилди. Фарғона шаҳрида болалар даволаш-реабилитация маркази иш бошлади.
Мавзуга доир:
Изоҳ (0)