Rustam Sa’diyev “Baron-2”da nima sababdan Ulug‘bek Qodirov rol o‘ynamagani, suratga olishda qaysi masalalarda qiynalgani va filmdagi kesilgan sahnalar haqida (video)

Rejissor Rustam Sa’diyev “Chotki TV” YouTube kanaliga bergan intervyusida “Baron-2. Sog‘inch” filmining kulminatsion voqeasi, nima uchun filmda Ulug‘bek Qodirov rol o‘ynamagani, filmni suratga olishda qaysi masalalarda qiynalgani va kinokartinaning kesilgan joylari haqida gapirdi.

Rustam Sa’diyev “Baron-2. Sog‘inch” filmining kulminatsion voqeasi haqida 

Aynan bitta kadrda maza qildim deb ayta olmayman, unda o‘zim junbushga kelib olingan kadrlar ham bor. Men umuman kutmagan kadrda tomoshabinning reaksiyasi bo‘ladi. Masalan, Dilnoza Kubayeva bilan bog‘liq sahna, ya’ni u ham  ayol, filmdagi voqealarda uni turmush o‘rtog‘ining boshiga kulfat tushganda sezishi, ayollar sezadi.

Ayollardagi sezgi holati xavotirli, o‘shandan keyin oilaviy rishtalarning qanday bog‘langani, bu yerda erini necha yillar davomida ko‘rmayotgan ayolning qismati, psixologik holati, undan tashqari boshqa yurtda jasorat ko‘rsatayotgan razvedkachi turmush o‘rtog‘ining holati, umuman, kinoni olishni boshlaganimda mana shu holat ko‘z oldimda turardi.

Tanqidchilar Dilnoza Kubayevaning farzand dunyoga keltirayotgan sahnasi sal qo‘pol olingani haqida ham fikr bildirdi, mayli, bu ham bitta fikr. Bu operatorning qarori, menga ma’qul bo‘lgan. U yerda hech qanday yomon kadr yo‘q, o‘ylaymanki, shu kinoning kulminatsion sahnasi bo‘lgan, — deydi rejissor.

Ulug‘bek Qodirov juda iste’dodli aktyor, men har doim bu haqda gapiraman. Gap uning qimmat aktyorligida emas, bu kinoda undan besh-o‘n baravar qimmat aktyorlar rol o‘ynadi, kinoda pul ahamiyatga ega emas.

Bu global mavzu, filmga e’tibor boshqacha, mablag‘ jihatidan ham vaziyat boshqacha. Shuning uchun bu yerda mablag‘ katta rol o‘ynamaydi. Birinchi voqelikda Ulug‘bek rol o‘ynagan, ikkinchi voqelikda uning obrazidagi ijro tugagan. Agar o‘sha voqea, g‘oya davom etganda u bo‘lishi mumkin edi.

Bu yerda qahramon yangi topshiriq bilan boshqa joyga ketyapti, undan keyin yangi voqealar boshlanib ketmoqda. Shuning uchun bu tabiiy hol, tomoshabinda birinchi qismida Ulug‘bek Qodirov rol o‘ynadi, ikkinchisida ham o‘ynaydi degan tushuncha bor, biroq hamma narsa bo‘lishi mumkin. Balki ikkinchisida o‘ynamay uchinchisida ham o‘ynashi mumkin, — deydi Rustam Sa’diyev.

Rejissor “Baron-2. Sog‘inch” filmini suratga olishda qaysi masalalarda qiynalgani 

Bu film juda ko‘p sinovlardan o‘tdi. Pandemiya bo‘ldi, film voqealarini ko‘p davlatlarda oldik, shunda ikkita davlatning munosabati ta’siriga tushib qoldi. Masalan, Misrda suratga olish ishlari bo‘layotgan vaqtda Turkiyaning aktyorlarini shu yerga olib kelishga to‘g‘ri keldi. Shunda Misrning 40 yoshgacha bo‘lgan erkaklariga viza berishi juda qiyin ekan, uni o‘zini siyosiy sabablari bir ekan, bilmadim. Bu masalaga bizning Tashqi ishlar vazirligi, elchixona vakillari kerak bo‘lsa Misr turk aktyorlariga viza bermagani uchun nota bilan chiqdi.

Keyin ular bu mamlakatga investitsiya kiritayotganini aytdi va ular turk aktyorlarini 24 soatda hamma aktyorlarni chiqarishini aytdi. Bu yoqdan har bir pulimiz hisob-kitob qilinayotgan edi. Shundan paytda hamma narsa o‘zimga qolib ketdi, prodyuser hech narsa qila olmagan holat bo‘ldi.

Kinoning tashkiliy jihatlarida yomon qiynalganman. Men hech qaysi kinofilmimda bunchalik qiynalmaganman. Qiynalganim shu — tashkiliy jihatlarda, pulning vaqtida yetib kelmaganida ko‘p qiynaldim, shu narsa bor ekan, o‘tib ketdim, — deydi rejissor.

Filmdagi eng uzun sahna qizlarni qanday yo‘l bilan chet elga olib chiqish jarayoni bo‘lgan, shu eng uzun dialog ham hisoblanadi. Sababi u yerda oldimizdagi vazifa shunaqa bo‘lgan, nafaqat bizning qizlarimiz, balki O‘rta Osiyodagi qizlarni, ayollarni, beva ayollarni shunaqa yo‘l bilan boshqa joylarga olib chiqib ketishmasin deb o‘sha joyini sal ochib berishga majbur bo‘lganmiz, kinoda atayin shunday qilingan. Qolgan joylarida uncha cho‘zilgan deb hisoblamayman.

Kinoning ozgina joylari kesilgan, kinoteatrlarni ham nazarda tutib kesilgan, film ikki soatdan uzun bo‘lsa, tomoshabinni qabul qilish ruhiyati charchab qoladi degan fikr ham yo‘q emas.

Shuning uchun harakat qilaman, dinamika bo‘lsa ikki soat ham tez o‘tib ketadi, o‘sha ma’noda kesilgan joylari bor. Biroq bir xil voqealarini kesamiz, ayrimlarini olamiz. Qo‘rqmasdan ayta olamanki, Rossiyadagi variantidan ko‘ra O‘zbekistondagi variantidan mening ko‘nglim to‘ldi. Bu yerda o‘zbekning ozgina qalbini cherta oladigan to‘xtalishlar bor. Ruslar shuni kesib-kesib o‘tkazib yuborishgan. Qozog‘istonlik bir muxlis kelib, Qozog‘istonda ham shu variantini qo‘yinglar, iltimos, dedi, chunki Rossiya ko‘p voqealarini kesib tashlagan, — deydi Rustam Sa’diyev.

• “90 foizi bir tiyinga qimmat”. Rejissor Rustam Sa’diyev hozirgi o‘zbek seriallari haqida (video).
• Rustam Sa’diyev 85 foiz rollar jahon kinoyulduzlari tomonidan ijro etilgan “Baron 2” filmi qachon premyera qilinishi haqida (video).
• “Baron-2. Sog‘inch”. Rustam Sa’diyevning sog‘lig‘ini yo‘qotishiga sabab bo‘lgan filmning yopiq taqdimotidan reportaj (foto va video).