АҚШ Давлат департаменти ва Киевдаги элчихонаси Украина ҳудудида бўлиб турган Америка фуқароларини зудлик билан мамлакатни тарк этишга чақирди. Аввалроқ Америка разведкаси Россия Украинанинг давлат объектларига зарбалар беришга тайёрланаётгани ҳақида огоҳлантирганди.
Хўш, АҚШнинг бу хавотирли баёноти қанчалик асосли? Россия вазиятни кескинлаштиришга тайёргарлик кўраётгани ростми?
«Тараққиёт стратегияси» маркази бўлим бошлиғи Фаррух Ҳакимов ушбу масала бўйича ўз фикрларини билдириб ўтди.
«Аввало шуни таъкидлаш керакки, АҚШ махсус хизматлари, айниқса «Совуқ уруш» даврида эгаллаган тарихий тажрибага эга. Улар анъанавий ва замонавий воситалар орқали маълумотлар билан ишлаш, уларни таҳлил қилиш ва шу асосда хулоса чиқариш бўйича етакчилар қаторида.
Шундан келиб чиқиб айтадиган бўлсак, АҚШ Давлат департаментининг ўз фуқароларини зудлик билан Украинани тарк этишга бўлган чақирувини хавотирли деб аташ мумкин.
Ҳозирда Россия ва Украина ўртасидаги урушнинг фронт чизиғи деярли ўзгаришларсиз сақланиб турибди. Албатта, Россия томони вазиятни кескинлаштириш эвазига ҳаддан зиёд чўзилиб кетган урушнинг тезроқ тугашига эришмоқчи бўлиши мумкин.
Чунки барчага маълумки, урушнинг ҳар бир куни томонларнинг катта сарф-харажатларини талаб қилади. Агар вазият кескинлашадиган бўлса, минтақадаги ҳолат янада оғирлашади. Шундоқ ҳам уруш туфайли бутун дунё иқтисодиётига жиддий путур етмоқда, Россия иқтисодиёти эса санкциялар туфайли ҳозирда жуда мускул аҳволда колмоқда. Ўз навбатида, Европа давлатлари энергетик инқироз ёқасида турибди. Бунинг натижасида ҳаттоки Россияга нисбатан қўлланилган санкцияларни юмшатиш масалалари ҳам муҳокама қилинмоқда.
Бундан ташқари, Запорожье ҳудудида жойлашган АЭС билан боғлиқ хавотирлар ҳам мавжуд. Урушнинг тезроқ тугашидан барча манфаатдор.
Албатта, воқеалар ривожи қандай бўлишини олдиндан аниқ айтиб бўлмайди. Кўп нарса етакчи мамлакат раҳбарларининг ўзаро музокаралари чоғида ҳал бўлиши ҳам мумкин.
Жорий йил сентябр ойида Самарқанда Ўзбекистон раислигида ШҲТнинг навбатдаги Саммити бўлиб ўтади. Шунингдек, ноябрда Индонезияда Катта йигирмалик давлатлар раҳбарлари жам бўлиши кутилмоқда. Ажаб эмаски, мана шу тадбирлардаги юзма-юз мулоқотлар чоғида урушнинг боришига таъсир кўрсатувчи кўп масалалар ҳал қилинади», - деди Фаррух Ҳакимов.
Шуни ҳам алоҳида таъкидлаш керакки, Владимир Зеленский Россия яқин орада Украинага ракета ҳужумларини кучайтириши мумкинлиги ҳақидаги хабарларга муносабат билдира туриб: "Агар улар бизга зарба беришни бошлашса, кучли жавоб қабул қилиб олишади", - деди.
Изоҳ (0)