Qirg‘iziston prezidenti Sadir Japarov 23-avgustni Rossiyaning Ulyanovsk viloyati yaqinida yuz bergan YTHda halok bo‘lgan qirg‘izistonliklar xotirasiga umumiy motam kuni deb e’lon qildi.
“Rossiyaning Ulyanovsk viloyatida sodir bo‘lgan voqea har birimizni dahshatda qoldirdi. Ushbu tuzatib bo‘lmas chuqur og‘riq barchaning qalbida aks-sado berdi. Yurtdoshlarimiz yo‘l-transport hodisasiga uchragani haqidagi xabarni katta qayg‘u bilan qabul qildik. Men halok bo‘lganlarning yaqinlari dardini tushunaman va ularga sherikman, ularga hozir juda og‘ir”, — dedi Qirg‘iziston rahbari o‘z murojaatida.
Japarov “YTHda halok bo‘lganlar va jarohatlanganlarning oila a’zolari va yaqinlariga chuqur hamdardlik bildirdi”, ularni sabrli bo‘lishga chaqirdi. Prezident baxtsiz hodisa oqibatida halok bo‘lganlarning yaqinlariga yordam ko‘rsatilishiga ishontirdi.
“Bu masala mening shaxsiy nazoratim ostida bo‘ladi”, — dedi Japarov.
Eslatib o‘tamiz, 21-avgust kuni Ulyanovsk viloyatida Novospasskoye va Nikolayevka aholi punktlari oralig‘idagi M-5 trassasida Mercedes mikroavtobusi va ikkita yuk avtomobili to‘qnashib ketgan edi. Oqibatda 16 kishi halok bo‘lgan, ulardan 14 nafari — Qirg‘iziston fuqarolari. Yana 22 kishi jabrlangan, ular og‘ir ahvolda kasalxonaga yotqizilgan.
Izoh (0)