Janubiy Koreya va AQSH katta ko‘lamli qo‘shma harbiy mashg‘ulotlarini boshladi

Janubiy Koreya va AQSH Ulchi Freedom Shield deb nomlangan qo‘shma harbiy mashg‘ulotlarni boshladi, ularning doirasida to‘rt yil ichida birinchi marta dala mashqlari o‘tkaziladi, deb yozadi “RBK”.

Mashg‘ulotlar uchta bosqichdan iborat bo‘ladi: komanda punktlari uchun kompyuter simulyatsiyasi, dala tayyorgarligi va fuqarolik mudofaasi bo‘yicha mashqlar. Dastlab harbiylar mudofaa qismini mashq qiladi va KXDR tomonidan Seul aholi punktlariga berilgan “hujumlar”ni qaytarishga tayyorlanadi. So‘ng ular qarshi hujumlar bo‘yicha amaliyot o‘tashni boshlaydi.

Manyovrlarga 16-avgustdan beri tayyorgarlik olib borilayotgan edi, mashg‘ulotlar so‘nggi yillardagi eng yirigiga aylanadi va 1-sentabrgacha davom etadi. Dala mashqlari davomida harbiylar 13 xil ssenariy bo‘yicha harakatlarni mashq qiladi. Ular atom elektr stansiyalarida qo‘lbola portlovchi qurilmalarni qidirishni, yarim o‘tkazgichlar zavodidagi yong‘inda to‘g‘ri harakat qilishni, bank tarmog‘i ishi to‘xtab qolishiga qarshi kurashishni, aeroportlarda terrorizmga qarshi kurashishni va dronlar hujumlarini qaytarishni mashq qiladi.

Bunday turdagi mashg‘ulotlar 2018-yildan buyon faqat kompyuter simulyatsiyalari yordamida o‘tkazilgan, deya aniqlik kiritdi Janubiy Koreya Mudofaa vazirligi. Manyovrlar bundan avvalgi prezident ma’muriyatining Pxenyan bilan aloqalarni normallashtirishga intilishlari tufayli o‘tkazilmay qo‘ygan. Koronavirus pandemiyasi ham yana bir sabab bo‘lgan.

Eslatib o‘tamiz, 17-avgust kuni Shimoliy Koreya Sariq dengizga qarata ikkita qanotli raketa uchirdi. Bu Janubiy Koreyaning amaldagi prezidenti Yun Sok Yol inauguratsiyasiga 100 kun bo‘lgan sanada amalga oshirildi. O‘sha kuni avvalroq u agar KXDR denuklearizatsiya (yadroviy qurolsizlanish)ga “qat’iy bel bog‘lagani”ni namoyon qilsa, Janubiy Koreya o‘z qo‘shnisiga iqtisodiy va texnologik jihatdan yordam berishini aytgandi. Shu bilan birga, Yun Sok Yol Shimoliy Koreya hukumatiga hech narsa xavf solmasligini ta’kidladi.