Ayni paytda 2800 tadan ortiq davlat aktivlari xususiylashtirish uchun sotuvga chiqarilgan. Bu haqda tadbirkorlar bilan muloqotda Davlat aktivlarini boshqarish agentligi direktori o‘rinbosari Bekzod Usmonov ma’lum qildi, deya xabar bermoqda “Daryo” muxbiri.
Bekzod Usmonovning aytishicha, hozirda davlat aktivlarini xususiylashtirish jarayoni ancha jadallashgan.
“Oxirgi 3 yilda davlat aktivlarini xususiylashtirish jarayonlari jadal amalga oshirilmoqda. Masalan, 2022-yil 15-avgustgacha 2800 tadan ortiq, qiymati 15,6 trillion so‘mlik davlat aktivlari xususiylashtirishga chiqarildi. 2020-yilda 860 ta, 2021-yilda 765 ta davlat aktivi sotuvga qo‘yilgan”– dedi agentlik rasmiysi.
Shuningdek, Bekzod Usmonov xususiylashtirilayotgan yirik davlat aktivlaridan bir nechtasini sanab o‘tdi.
“Hozirgi kunda katta-katta davlat obyektlarini ham sotyapmiz. Misol uchun, Hyatt Regency mehmonxonasining xususiylashtirish ishlari boshlangan. Kimyo sanoatidagi eng yirik korxonalardan biri, ishchilari soni bo‘yicha ham respublikada oldingi o‘rinlarda turuvchi “Farg‘ona azot”ni ham sotuv jarayonini amalga oshiryapmiz. Shu bilan birga, “Dehqonobod kaliy zavodi”ni xususiylashtirish ishlari boshlangan”, – dedi u.
Avvalroq O‘zbekistonda Coca-Cola’ning davlat ulushi 252,2 million dollarga Turkiya kompaniyasiga sotilgani xabar qilingandi.
Izoh (0)