Айни пайтда 2800 тадан ортиқ давлат активлари хусусийлаштириш учун сотувга чиқарилган. Бу ҳақда тадбиркорлар билан мулоқотда Давлат активларини бошқариш агентлиги директори ўринбосари Бекзод Усмонов маълум қилди, дея хабар бермоқда «Дарё» мухбири.
Бекзод Усмоновнинг айтишича, ҳозирда давлат активларини хусусийлаштириш жараёни анча жадаллашган.
«Охирги 3 йилда давлат активларини хусусийлаштириш жараёнлари жадал амалга оширилмоқда. Масалан, 2022 йил 15 августгача 2800 тадан ортиқ, қиймати 15,6 триллион сўмлик давлат активлари хусусийлаштиришга чиқарилди. 2020 йилда 860 та, 2021 йилда 765 та давлат активи сотувга қўйилган»– деди агентлик расмийси.
Шунингдек, Бекзод Усмонов хусусийлаштирилаётган йирик давлат активларидан бир нечтасини санаб ўтди.
«Ҳозирги кунда катта-катта давлат объектларини ҳам сотяпмиз. Мисол учун, Hyatt Regency меҳмонхонасининг хусусийлаштириш ишлари бошланган. Кимё саноатидаги энг йирик корхоналардан бири, ишчилари сони бўйича ҳам республикада олдинги ўринларда турувчи «Фарғона азот»ни ҳам сотув жараёнини амалга оширяпмиз. Шу билан бирга, «Деҳқонобод калий заводи»ни хусусийлаштириш ишлари бошланган», – деди у.
Аввалроқ Ўзбекистонда Coca-Cola’нинг давлат улуши 252,2 миллион долларга Туркия компаниясига сотилгани хабар қилинганди.
Изоҳ (0)