Ukraina qurolli kuchlari Rossiyani “texnogen ofat”ni yuzaga keltirishda ayblash uchun Zaporojye AESda “shov-shuvli provokatsiya” tayyorlamoqda. Bu haqda Rossiya Mudofaa vazirligi bayonotida aytiladi, deb yozadi Meduza.
Idora qayd etishicha, 19-avgust kuni, Ukrainada BMT bosh kotibi Antoniu Guterrish tashrif bilan bo‘lib turgan paytda, Ukraina qurolli kuchlari 44-artilleriya brigadasi Nikopol shahrida o‘tochar pozitsiyalardan Zaporojye AESga zarbalar beradi, oqibatlar uchun aybni esa Rossiya harbiylari bo‘yniga qo‘yadi.
“Ukraina hukumati ushbu atom elektr stansiyasini Rossiya qo‘shinlari bosib olgani haqida ko‘p marta mish-mishlar tarqatgan, o‘zlari esa AESni pana qilgan holda uzoq masofali artilleriya tizimlaridan zarbalar bermoqda. Shu narsaga e’tiborni qaratamizki, stansiya hududida ham, unga tutash tumanlarda ham Rossiya qo‘shinlarining og‘ir qurol-yarog‘lari yo‘q. U yerda faqat qo‘riqchilik bo‘linmalari bor”, — deyiladi Rossiya Mudofaa vazirligi xabarida.
Zaporojye AES — Yevropadagi eng yirik atom elektr stansiyasi. U Energodar shahrida joylashgan. Mart oyidan buyon uni va butun shaharni Rossiya qo‘shinlari nazorat qilib kelmoqda. Avgust oyida stansiya bir necha marta o‘qqa tutildi. Ukraina va Rossiyada ushbu zarbalarda bir-birini ayblamoqda.
G7 mamlakatlari Moskvani zudlik bilan AES ustidan nazoratni Kiyevga qaytarishga chaqirdi, ushbu da’vatni yana 35 ta mamlakat qo‘llab-quvvatladi. BMT AESdan harbiylar va texnikani olib chiqib ketishni va u yerda qurolsizlantirilgan hudud yaratishni taklif qildi. O‘z navbatida, Rossiya nazorati ostidagi Zaporojye viloyati hukumati stansiya atrofida osoyishtalik rejimini e’lon qilishni taklif etdi.