“O‘qituvchi huquqi asosiy qonun bilan himoya qilinsa, uning ertasidan ko‘ngli to‘q bo‘ladi” — deputat

Konstitutsiyaning 41-moddasi bo‘yicha taklif etilayotgan loyihaning ahamiyati va bu o‘zgartirish o‘qituvchilar ishiga qay darajada ta’sir ko‘rsatishi haqida Sharof Rashidov nomidagi Samarqand davlat universitetining “Inson resurslarini boshqarish” fakulteti dekani, Xalq deputatlari Samarqand viloyat Kengashi deputati Shohruh Jo‘raqulov o‘z mulohazalarini bildirdi.

Konstitutsiyaga kiritilayotgan o‘zgarishlarning hammasi salmoqli. Ular mamlakatning ijtimoiy taraqqiy vazifalarini bajarishga, rivojlantirishga qaratilgan. Mening e’tiborimni tortgan jihati, o‘zim ham o‘qituvchiman, oilam ham o‘qituvchi. Biz uchinchi avlod o‘qituvchilarimiz. Shu bois ham 41-moddaga kiritilayotgan o‘zgarishlar, ta’lim sohasi deymizmi, yoki aynan u yerda pedagogning maqomi haqida kiritilgan jumlalar, hammasi muhim ahamiyatga ega. Chunki, hammamiz yaxshi bilganimiz, o‘qituvchi millatning, xalqning ertangi kuniga xizmat ko‘rsatadigan, ertangi kunga o‘zining hissasini qo‘shadigan qatlam hisoblanadi. Olib borilayotgan islohotlarning bilvosita ishtirok etadigan qatlami. Bir inson umrining uchdan bir qismi, yoki to‘rtdan bir qismini aynan ta’lim dargohlarida, o‘qituvchilar bilan muloqotda, ulardan bilim olib, izlanishlar bilan o‘tkazadi. Ular bilan birga yashaydi, fikrlaydi, ustoz orttiradi. Murg‘ak go‘dakning hayotga ilk qarashlaridan tortib, bir olimni tarbiyalab, voyaga yetkazishgacha bo‘lgan mashaqqatni zimmasiga olgan kasb hisoblanadi. Shu bois ham buni konstitutsion jihatdan qo‘llab-quvvatlash, uning maqomini mustahkamlash muhim ahamiyatga ega”, — deydi Shohruh Jo‘raqulov.

Masalan keyingi yillardagi o‘zgarishlarni aytaylik, o‘qituvchilarning paxtadan ozod qilinishi, turli ommaviy tardirlardan oldin ijtimoiy obyektlarni tozalab ‘shanbalik’ qilishi, har xil o‘qituvchilarga aloqasi bo‘lgan-bo‘lmagan yig‘ilishlarga chaqirtirilib, ulardan fon sifatida foydalanish mumkinligini yo‘qqa chiqardi.

Ularning mavqeyini ko‘tarishga intilish, oyiligini oshirish, o‘qituvchilarning mavqeyi joyiga tushdi. Aslida o‘qituvchining huquqi himoya qilinishi, turli bosimlardan, tazyiqlardan himoya qilinishi muhim ahamiyatga ega. Shunday qilinsa, bugungi o‘qituvchi birinchi o‘rinda faqat o‘zining ishi bilan shug‘ullanadi. Ikkinchi tomondan yaxshi oylik olar ekan, uchinchi tomondan uning haq-huquqi katta qonun darajasida himoya qilinar ekan, u ertasidan ko‘ngli to‘q bo‘ladi. Sifatli ta’lim beradi, sifatli tadqiqot olib borib, malakali mutaxassis yaratadi. Biz konstitutsiyaga bo‘layotgan o‘zgarishga shu takliflarni bergan edik. Rahbariyat ham bu takliflarni qo‘llab-quvvatlagan. Biz o‘zgarishlarni qo‘llab-quvvatlaymiz”, — deydi Shohruh Jo‘raqulov.