Конституциянинг 41-моддаси бўйича таклиф этилаётган лойиҳанинг аҳамияти ва бу ўзгартириш ўқитувчилар ишига қай даражада таъсир кўрсатиши ҳақида Шароф Рашидов номидаги Самарқанд давлат университетининг «Инсон ресурсларини бошқариш» факультети декани, Халқ депутатлари Самарқанд вилоят Кенгаши депутати Шоҳруҳ Жўрақулов ўз мулоҳазаларини билдирди.
Конституцияга киритилаётган ўзгаришларнинг ҳаммаси салмоқли. Улар мамлакатнинг ижтимоий тараққий вазифаларини бажаришга, ривожлантиришга қаратилган. Менинг эътиборимни тортган жиҳати, ўзим ҳам ўқитувчиман, оилам ҳам ўқитувчи. Биз учинчи авлод ўқитувчиларимиз. Шу боис ҳам 41-моддага киритилаётган ўзгаришлар, таълим соҳаси деймизми, ёки айнан у ерда педагогнинг мақоми ҳақида киритилган жумлалар, ҳаммаси муҳим аҳамиятга эга. Чунки, ҳаммамиз яхши билганимиз, ўқитувчи миллатнинг, халқнинг эртанги кунига хизмат кўрсатадиган, эртанги кунга ўзининг ҳиссасини қўшадиган қатлам ҳисобланади. Олиб борилаётган ислоҳотларнинг билвосита иштирок этадиган қатлами. Бир инсон умрининг учдан бир қисми, ёки тўртдан бир қисмини айнан таълим даргоҳларида, ўқитувчилар билан мулоқотда, улардан билим олиб, изланишлар билан ўтказади. Улар билан бирга яшайди, фикрлайди, устоз орттиради. Мурғак гўдакнинг ҳаётга илк қарашларидан тортиб, бир олимни тарбиялаб, вояга етказишгача бўлган машаққатни зиммасига олган касб ҳисобланади. Шу боис ҳам буни конституцион жиҳатдан қўллаб-қувватлаш, унинг мақомини мустаҳкамлаш муҳим аҳамиятга эга», — дейди Шоҳруҳ Жўрақулов.Шоҳруҳ Жўрақуловнинг таъкидлашича, ўзгариш биринчи ўринда педагог ишини холис, объектив баҳолаш имконини беради. Педагогга фақат ўзининг соҳаси билан шуғулланиб, ижод қилишига, таълим беришга имконият яратади.
Масалан кейинги йиллардаги ўзгаришларни айтайлик, ўқитувчиларнинг пахтадан озод қилиниши, турли оммавий тардирлардан олдин ижтимоий объектларни тозалаб ‘шанбалик’ қилиши, ҳар хил ўқитувчиларга алоқаси бўлган-бўлмаган йиғилишларга чақиртирилиб, улардан фон сифатида фойдаланиш мумкинлигини йўққа чиқарди.Уларнинг мавқейини кўтаришга интилиш, ойилигини ошириш, ўқитувчиларнинг мавқейи жойига тушди. Аслида ўқитувчининг ҳуқуқи ҳимоя қилиниши, турли босимлардан, тазйиқлардан ҳимоя қилиниши муҳим аҳамиятга эга. Шундай қилинса, бугунги ўқитувчи биринчи ўринда фақат ўзининг иши билан шуғулланади. Иккинчи томондан яхши ойлик олар экан, учинчи томондан унинг ҳақ-ҳуқуқи катта қонун даражасида ҳимоя қилинар экан, у эртасидан кўнгли тўқ бўлади. Сифатли таълим беради, сифатли тадқиқот олиб бориб, малакали мутахассис яратади. Биз конституцияга бўлаётган ўзгаришга шу таклифларни берган эдик. Раҳбарият ҳам бу таклифларни қўллаб-қувватлаган. Биз ўзгаришларни қўллаб-қувватлаймиз», — дейди Шоҳруҳ Жўрақулов.
Изоҳ (0)