O‘zbekistonda yanvar oyida tijorat kreditlari 24,3 foizni, iyulda 21,5 foizni tashkil etdi. Bu haqda Investitsiyalar va tashqi savdo vazirligi tomonidan o‘tkazilayotgan tadbirkorlar bilan muloqotda Markaziy bank raisi o‘rinbosari Behzod Hamroyev ma’lum qildi.
Behzod Hamroyev muloqotdagi chiqishida respublikadagi tijorat kreditlari foizlari nima uchun yuqoriligiga izoh berdi.
“Tijorat krediti uchun foizlar yuqoriligidan ko‘p tadbirkorlar e’tiroz bildiradi. Bilamizki, foizlar inflyatsiya darajasi bilan o‘lchanadi. Inflyatsiya yuqori bo‘lsa, foizlar ham yuqori bo‘ladi. Ertaga, qadam-baqadam inflyatsiyamiz tushib borsa, foizlar ham pasayadi.
Biz har oyda o‘rtacha foizlarni e’lon qilib boramiz. Imtiyozli foizlarni qo‘shmagan holda hisoblansa, faqatgina tijorat kreditlari yanvar oyida 24,3 foizni tashkil qilgan bo‘lsa, foiz stavka pasaygani uchun, iyul oyida bu ko‘rsatkich 21,5 foizgacha pasaydi. O‘ylaymanki, bu foizlar inflyatsiya bilan birga pasayib boradi. Hozir tadbirkorlarning o‘zidan inflyatsion kutilmalarni so‘rasam, kamida 15-16 foiz atrofida chiqadi. 16 foiz bo‘lsa, 2-3 foiz ustiga resurs narxi, risk va qaytish narxini qo‘ysangiz, kredit narxi 20 foizga oshyapti”, — dedi tashkilot rasmiysi.
Ayni paytda Investitsiyalar va tashqi savdo vazirligi tomonidan prezident va tadbirkorlar muloqoti oldidan murojaatlar qabul qilish bo‘yicha maxsus shtab va Call-markaz tashkil etilgan. Hozirga qadar biznes sohasi vakillaridan 10 mingdan ortiq murojaatlar kelib tushgan. Behzod Hamroyevning qo‘shimcha qilishicha, mazkur murojaatlarning katta qismi bank xizmatlari bilan bog‘liqdir.
“Shtabga qilingan murojaatlarning 1 ming 800 tasi aynan bank tizimiga kelib tushgan. Shundan 96 foizida kredit ajratish yoki kredit muddatini cho‘zish masalasi so‘ralgan. Bularning barchasi bilan banklar alohida shug‘ullanib, yechim topildi”, — dedi Markaziy bank raisi o‘rinbosari.
Izoh (0)