“Daryo” jurnalisti Musulmonbek Ibrohimov faoliyatiga to‘sqinlik qilib, uning yong‘in sodir bo‘lgan joydan videoreportaj tayyorlashiga yo‘l qo‘ymagan IIB xodimlari uzr so‘radi.
Ma’lum bo‘lishicha, sayt jurnalisti Toshkent shahridagi ko‘p qavatli uyda sodir bo‘lgan yong‘in tafsilotlarini o‘rganish maqsadida voqea joyiga borgan. Jurnalist holatni tasvirga olayotgan paytda IIB formasidagi xodim uning yoniga kelib, tasvirga olishiga qarshilik ko‘rsatgan. Boshqa bir fuqaro esa jurnalistni tepib, videotasvirga olishiga qarshi ekanini aytgan. Jurnalist IIB xodimiga internet-nashri jurnalisti ekanini aytib, o‘zini tanishtirishi kerakligini, uni tepib, faoliyatiga qarshilik ko‘rsatayotgan fuqaro bilan shug‘ullanishi kerakligini bildirgan. Ammo xodim yong‘in sodir bo‘layotgan paytda o‘zini tanishtirmaganini aytib, jurnalistga bo‘limga borishlari kerakligini uqtirgan.
Jurnalist esa IIB xodimiga u ish bilan mashg‘ul ekanini, uning faoliyatiga to‘sqinlik qilganidan ko‘ra jurnalistni tepgan fuqaro ishi bilan shug‘ullanishi kerakligini aytgan. Va buni fuqaroning og‘zaki murojaati sifatida qabul qilishini so‘ragan. Qolaversa, notanish kimsa tepkisi sabab o‘zida og‘riq borligini, shu bois ayni paytda yozma tarzda ariza berolmasligini ta’kidlagan.
“Men Musulmonbek Ibrohimovning jurnalist ekanini bilmadim, boshqa bir fuqaro voqeani tasvirga olyapti deb o‘yladim. Shu sabab uning videoga olishiga qarshilik qildim. Bu ishim uchun uzr so‘rayman”, — deydi 69-sonli “Lashkarbegi” mahallasida profilaktika inspektori sifatida faoliyat yuritishini aytgan Zafar ismli xodim.
Aniqlanishicha, jurnalistni 69-sonli “Lashkarbegi” mahallasidagi huquq-tartibot maskaniga olib borgan IIB xodimlari — Zafar va Aziz jurnalist telefoniga bizni videoga oldi degan gumonda, shuningdek, unga majburlab ariza yozdirish maqsadida qo‘lini orqaga qayirgan va kuch ishlatgan.
“Bu harakatimiz uchun uzr so‘raymiz”, — deydi IIB xodimi.
Voqea haqida xabar topgan mas’ullar — tuman IIBning profilaktika inspektorlari bilan ishlovchi xodimi voqea joyiga kelib, to‘liq ma’lumotga ega bo‘lgach, “Daryo” jurnalisti Musulmonbek Ibrohimovdan uzr so‘radi. Shuningdek, xodimlariga og‘zaki tanbeh berdi. Jurnalist esa bag‘rikenglik qilib, ularni kechirdi. Jurnalistga tibbiy yordam ko‘rsatildi.
“Daryo” jurnalistlar faoliyatiga to‘sqinlik qiluvchi IIB xodimlari harakatini qoralab, demokratik jamiyatda bunday qusurlarga qarshi murosasiz kurashish kerak deb hisoblaydi.
Izoh (0)