Ўзбекистонда январь ойида тижорат кредитлари 24,3 фоизни, июлда 21,5 фоизни ташкил этди. Бу ҳақда Инвестициялар ва ташқи савдо вазирлиги томонидан ўтказилаётган тадбиркорлар билан мулоқотда Марказий банк раиси ўринбосари Беҳзод Ҳамроев маълум қилди.
Беҳзод Ҳамроев мулоқотдаги чиқишида республикадаги тижорат кредитлари фоизлари нима учун юқорилигига изоҳ берди.
«Тижорат кредити учун фоизлар юқорилигидан кўп тадбиркорлар эътироз билдиради. Биламизки, фоизлар инфляция даражаси билан ўлчанади. Инфляция юқори бўлса, фоизлар ҳам юқори бўлади. Эртага, қадам-бақадам инфляциямиз тушиб борса, фоизлар ҳам пасаяди.
Биз ҳар ойда ўртача фоизларни эълон қилиб борамиз. Имтиёзли фоизларни қўшмаган ҳолда ҳисобланса, фақатгина тижорат кредитлари январь ойида 24,3 фоизни ташкил қилган бўлса, фоиз ставка пасайгани учун, июль ойида бу кўрсаткич 21,5 фоизгача пасайди. Ўйлайманки, бу фоизлар инфляция билан бирга пасайиб боради. Ҳозир тадбиркорларнинг ўзидан инфляцион кутилмаларни сўрасам, камида 15-16 фоиз атрофида чиқади. 16 фоиз бўлса, 2-3 фоиз устига ресурс нархи, риск ва қайтиш нархини қўйсангиз, кредит нархи 20 фоизга ошяпти», — деди ташкилот расмийси.
Айни пайтда Инвестициялар ва ташқи савдо вазирлиги томонидан президент ва тадбиркорлар мулоқоти олдидан мурожаатлар қабул қилиш бўйича махсус штаб ва Call-марказ ташкил этилган. Ҳозирга қадар бизнес соҳаси вакилларидан 10 мингдан ортиқ мурожаатлар келиб тушган. Беҳзод Ҳамроевнинг қўшимча қилишича, мазкур мурожаатларнинг катта қисми банк хизматлари билан боғлиқдир.
«Штабга қилинган мурожаатларнинг 1 минг 800 таси айнан банк тизимига келиб тушган. Шундан 96 фоизида кредит ажратиш ёки кредит муддатини чўзиш масаласи сўралган. Буларнинг барчаси билан банклар алоҳида шуғулланиб, ечим топилди», — деди Марказий банк раиси ўринбосари.
Изоҳ (0)