Tadbirkorlarga kredit mablag‘lari yetmayotganining yaxshi tomoni ham bor. Bu haqda Investitsiyalar va tashqi savdo vazirligi tomonidan o‘tkazilayotgan tadbirkorlar bilan muloqotda Markaziy bank raisi o‘rinbosari Behzod Hamroyev ma’lum qildi.
Behzod Hamroyevning ta’kidlashicha, hududlarda ko‘p tadbirkorlar kredit yetishmayotganidan norozi bo‘ladi.
“Ayniqsa, hududlarda tadbirkorlar tomonidan kredit, resurs yetmayapti yoki tugab qoldi degan mazmundagi murojaatlar juda ko‘p bo‘ladi. Bu bir tomondan yaxshi. Qaysi ma’nodaki, mamlakatimizda investitsion faollik juda yuqori. Yangi investitsiya qilishga intilish kuchli.
Qo‘shni davlatlar yoki iqtisodiyoti bizning darajamizdagi mamlakatlarda kredit qoldig‘i yiliga 4-6 foizga oshadi. Chunki iqtisodiyotda kredit olib, ishlatishga talab yo‘q. Bizda esa aksincha. Bir tarafdan bunga xursand bo‘lishimiz kerak. Lekin ikkinchi tarafdan kredit miqdori ham banklarning mavjud imkoniyatlaridan kelib chiqib, iqtisodiyot o‘sishiga qarab yuqorilab boryapti.
Bitta misol, 2016-2017-yillarda respublikada ajratiladigan kreditlar (yillik) 7-8 milliard dollar atrofida bo‘lgan. 2021-yil yakunida 1 yilda) jami ajratilgan kreditlar hajmi 16 milliard dollardan oshdi. Bu ikki baravardan ko‘p oshish degani. Masalan, 2022-yilning o‘tgan 7 oyi davomida tijorat banklari tomonidan 101 trillion so‘mlik kreditlar ajratilgan. Xursand bo‘ladigan jihat, shundan 50-60 foizi tadbirkorlarga berilgan. Bu o‘ylaymanki, kelajakda iqtisodiy o‘sishimizga katta yordam bo‘ladi”, — dedi Markaziy bank rasmiysi.
Avvalroq Behzod Hamroyev tijorat krediti foizlari nega yuqori ekaniga izoh bergandi.
Izoh (0)