Тадбиркорларга кредит маблағлари етмаётганининг яхши томони ҳам бор. Бу ҳақда Инвестициялар ва ташқи савдо вазирлиги томонидан ўтказилаётган тадбиркорлар билан мулоқотда Марказий банк раиси ўринбосари Беҳзод Ҳамроев маълум қилди.
Беҳзод Ҳамроевнинг таъкидлашича, ҳудудларда кўп тадбиркорлар кредит етишмаётганидан норози бўлади.
«Айниқса, ҳудудларда тадбиркорлар томонидан кредит, ресурс етмаяпти ёки тугаб қолди деган мазмундаги мурожаатлар жуда кўп бўлади. Бу бир томондан яхши. Қайси маънодаки, мамлакатимизда инвестицион фаоллик жуда юқори. Янги инвестиция қилишга интилиш кучли.
Қўшни давлатлар ёки иқтисодиёти бизнинг даражамиздаги мамлакатларда кредит қолдиғи йилига 4-6 фоизга ошади. Чунки иқтисодиётда кредит олиб, ишлатишга талаб йўқ. Бизда эса аксинча. Бир тарафдан бунга хурсанд бўлишимиз керак. Лекин иккинчи тарафдан кредит миқдори ҳам банкларнинг мавжуд имкониятларидан келиб чиқиб, иқтисодиёт ўсишига қараб юқорилаб боряпти.
Битта мисол, 2016-2017 йилларда республикада ажратиладиган кредитлар (йиллик) 7-8 миллиард доллар атрофида бўлган. 2021 йил якунида 1 йилда) жами ажратилган кредитлар ҳажми 16 миллиард доллардан ошди. Бу икки баравардан кўп ошиш дегани. Масалан, 2022 йилнинг ўтган 7 ойи давомида тижорат банклари томонидан 101 триллион сўмлик кредитлар ажратилган. Хурсанд бўладиган жиҳат, шундан 50-60 фоизи тадбиркорларга берилган. Бу ўйлайманки, келажакда иқтисодий ўсишимизга катта ёрдам бўлади», — деди Марказий банк расмийси.
Аввалроқ Беҳзод Ҳамроев тижорат кредити фоизлари нега юқори эканига изоҳ берганди.
Изоҳ (0)