Shavkat Mirziyoyev 18-avgust kuni Jidda shahrida Saudiya Arabistoni podshohligining yetakchi kompaniyalari va moliyaviy tuzilmalari rahbarlari bilan uchrashuv o‘tkazdi. Bu haqda Prezident matbuot xizmati xabar qildi.
Tadbirda investitsiyalar vaziri Xolid al-Falih hamda podshohlikning “ACWA Power”, “SABIC”, “Saudi National Bank”, “Al Rajhi Capital”, “Ma’aden”, “Petromin”, “Jamjoom Pharma”, “SEDCO”, “Salic”, “Albawani”, “Ajlan & Bros”, “Desert Technologies” kabi yigirmaga yaqin eng yirik kompaniya va korporatsiyalari rahbarlari ishtirok etgan.
Prezident kecha valiahd shahzoda bilan muzokaralarda ikki tomonlama savdo aylanmasini bir necha karra ko‘paytirish, tadbirkorlarning tashabbuslarini har tomonlama qo‘llab-quvvatlash va investitsiya loyihalarni moliyalashtirish bo‘yicha kelishuvga erishilganini ta’kidlagan.
Mamlakatda muvaffaqiyatli ish yuritayotgan Saudiya kompaniyalarining tajribasi ko‘rsatib o‘tilgan. Masalan, “ACWA Power” kompaniyasi bilan hamkorlikda 2 milliard 600 million dollarlik yirik energetika loyihalari boshlangan.
Ta’kidlanishicha, O‘zbekiston—Saudiya ishbilarmonlar kengashi yakunida umumiy qiymati 14 milliard dolladan ziyod loyihalarni amalga oshirish to‘g‘risida bitimlar imzolangan.
Davlat rahbari Saudiya kompaniyalarini yangi loyihalarni ishlab chiqish va amalga oshirishda hamkorlik qilishga chaqirgan.
Uchrashuvda Shavkat Mirziyoyev saudiyalik ishbilarmonlarni O‘zbekistondagi yirik banklar, sanoat va infratuzilma obyektlarini xususiylashtirish jarayonlarida ishtirok etishga taklif etgan. Qo‘shma loyihalarni amalga oshirish uchun istiqbolli sohalar sifatida “yashil” energetika va “yashil” iqtisodiyot ko‘rsatib o‘tilgan.
O‘zbekiston shamol elektr stansiyalarini qurish, “yashil” vodorod ishlab chiqarish, muqobil energetikani rivojlantirish, sanoatda raqamlashtirishni chuqurlashtirish va qo‘shma ilmiy tadqiqotlar bilan shug‘ullanish borasida hamkorlikka tayyor ekani ta’kidlangan.
Prezident O‘zbekiston raqamli iqtisodiyot, bio va nanotexnologiyalar, dasturiy ta’minot, innovatsiyalar va sun’iy intellekt sohalarida sheriklikni kengaytirishdan manfaatdorligini qayd etgan.
Oziq-ovqat mahsulotlarini ishlab chiqarish, sog‘liqni saqlash va turizm loyihalarini amalga oshirishga alohida e’tibor qaratish taklif qilingan.
Shuningdek, O‘zbekistonda Saudiya taraqqiyot fondi ishtirokida suv va elektr ta’minoti borasidagi infratuzilmaviy loyihalarni takomillashtirish ishlarini davom ettirish rejalashtirilgan.
Saudiya Arabistoni kompaniya, xolding va korporatsiyalari rahbarlari O‘zbekistonda faol biznes uchun yaratilgan sharoitlarni yuqori baholagan. O‘z chiqishlarida ular qo‘shma loyihalarni amalga oshirish rejalarini bayon qilib, turli xil yo‘nalishlarda o‘zaro aloqalar va sheriklikni rivojlantirishga doir nuqtai nazari bilan bo‘lishgan.
Shavkat Mirziyoyev saudiyalik hamkorlarning taklif va fikr-mulohazalarini tinglab, barcha loyihalarning amalga oshirilishi ustidan qat’iy nazorat o‘rnatilishini qayd etgan.
Mutasaddilarga ta’sirchan mexanizmlar va aniq ijro muddatlari ko‘rsatilgan kompleks “Yo‘l xaritasi”ni qabul qilish topshirilgan. Shu orqali tashrif doirasida erishilgan barcha kelishuvlar ijrosi uchun tegishli vazirlik va idoralar rahbarlari shaxsan javobgar bo‘ladi.
Izoh (0)